Роналду ва Месси бир жамоада ўйнашга рози бўлди

Аргентина терма жамоасининг собиқ ҳужумчиси Карлос Тевес футбол тарихидаги энг қизиқарли учрашувлардан бирига айланиши мумкин бўлган хайрлашув ўйинини ташкил этмоқда. 

Унда бир жамоа сафида Криштиану Роналду ва Лионель Месси майдонга тушиши кутилмоқда, деб хабар беради TyC Sports нашри ўз манбасига таяниб.

«Роналду: “Албатта келаман”, деди. Мессини ҳам кўндириш қийин бўлмади. Иккаласи ҳам розилик берди», — дея таъкидлаган Тевес.

Маълумотларга кўра, Тевеснинг хайрлашув учрашуви Буэнос-Айресдаги машҳур «Ла Бомбонера» стадионида ўтказилиши режалаштирилган. Собиқ футболчи ўз фаолияти давомида Европа клублари ва Аргентина терма жамоасида бирга ўйнаган бир қатор таниқли футболчиларни ҳам таклиф қилишни мўлжалламоқда.

Лионель Месси ва Криштиану Роналду профессионал фаолияти мобайнида ҳеч қачон бир жамоа сафида — на расмий, на кўргазмали учрашувларда — бирга ўйнашмаган. Улар бутун карераси давомида клуб ва терма жамоа даражасида асосий рақиблар сифатида танилган: Месси — Аргентина, Роналду эса Португалия терма жамоаси шарафини ҳимоя қилиб келган.

Икки юлдузнинг расмий клубларидан ташқари таркибда бир вақтнинг ўзида майдонга тушган ягона ҳолат 2023 йил январь ойида қайд этилган. Ўшанда Месси ўйнаган француз клуби ПСЖ Ар-Риёд юлдузлар жамоасига қарши ўртоқлик учрашуви ўтказган, Саудия Арабистонида тузилган ушбу терма жамоага эса Роналду сардорлик қилган эди.