Садио Мане терма жамоадаги фаолиятини якунлади

Сенегал терма жамоасининг етакчи ҳужумчиси Садио Мане миллий жамоа таркибидаги фаолиятини якунлади. Бу ҳақда сенегаллик Le Quotidien нашри хабар берди.

"Билингки, мен бу байроқ учун барча нарсадан воз кечдим. Барча кучимни бердим ва ҳар доим юртимиз учун майдонда охиригача курашдим", – деди Мане ўз баёнотида.

34 ёшли Садио Мане Сенегал терма жамоаси сафида 130 та ўйин ўтказиб, 54 та гол урган. У шу натижа билан миллий жамоа тарихида энг кўп гол урган футболчига айланган. Мане Сенегал билан бирга 2021 йилда Африка миллатлар кубоги соҳиби бўлган, шунингдек, 2019 ва 2026 йилларда мусобақанинг кумуш медалини қўлга киритган.

2023 йилдан буён Мане Саудия Арабистонининг "Ал-Наср" клуби шарафини ҳимоя қилмоқда. У 2026 йилги мавсум якунларига кўра Саудия Арабистони чемпионига айланган жамоа таркибида ўйнади. Бундан олдин сенегаллик футболчи Франциянинг "Мец", Австриянинг "Зальцбург", Англиянинг "Саутгемптон" ва "Ливерпуль", шунингдек, Германиянинг "Бавария" клубларида тўп сурган.

"Ливерпуль" таркибида Мане Англия чемпиони, Англия кубоги ва Лига кубоги соҳиби, шунингдек, Чемпионлар лигаси ва УЕФА Суперкубоги ғолиби бўлган. "Бавария" билан эса Германия чемпионлиги ва мамлакат Суперкубогини қўлга киритган.