"Салернитана" - Шомуродовнинг севимли клуби
Шомуродов салерноликларга гол уришни яхши кўради
А Серия доирасида бўлиб ўтган "Кальяри" - "Салернитана" учрашувида мезбонлар 4:2 ҳисобида зафар қучди. Ўйинни захирадан бошлаган Элдор Шомуродов икки бора салерноликлар дарвозасини ишғол қилди.
Сўнгги бир йил ичида Шомуродов "Салернитана" билан 3 бора тўқнаш келган ва 3 та гол уриб, 1 та ассистни ўз ҳисобига ёздириб қўйган.
2023 йил 2 апрель куни бўлиб ўтган "Специя" - "Салернитана" баҳсида Шомуродов 70-дақиқада ҳисобни тенглаштирувчи голни урган. Бу унинг жамоадаги дебют голи бўлганди.
Ҳамюртимиз 2023 йил 23 октябрда ўтказилган "Салернитана" - "Кальяри" учрашувининг 88-дақиқасида Виоланинг голига ассистентлик қилганди. Ўшанда томонлар дурангга имзо чеккан.
2024 йил 9 март куни Шомуродов яна "Салернитана"га қарши ўйнади. Бу сафар у дублни расмийлаштириб, жамоасининг муҳим ғалабасига ўз ҳиссасини қўшди.
Эслатиб ўтамиз, "Салернитана" 28 ёшли футболчини қишки трансферлар ойнасида ўз таркибига қўшиб олмоқчи эди, лекин "Кальяри" ҳужумчимизни қўйиб юбормади ва мавсум сўнггигача қолишини истади. Бу трансферга "Рома" ҳам рози бўлганди.
Шомуродовнинг трансфер ҳуқуқи ҳали ҳам римликларга тегишли бўлиб, унинг шартномаси 2026 йилгача амал қилади. Яқиндагина ўз мураббийини алмаштирган "Рома" таркибига ёзги трансферлар ойнасида Элдор қайтиши мумкин.
Изоҳлар (0)