Саудияликларнинг тўхташ нияти йўқ!

Ушбу ёзнинг энг катта воқеликларидан бири бу Саудия Арабистони клубларининг амалга ошираётган трансферларидир. Клублар ким ўзарга ўйнаб, кўплаб юлдузларни Европадан Осиёга кўчирди. Шу билан бирга, жамоалар Чемпионлар лигасида ҳам иштирок этиш учун ҳаракат қилмоқда. Яқиндагина эса Араб чемпионлари кубоги финалида "Ан-Наср" "Ал-Ҳилол" устидан ғалаба қозонди. Мағлубиятга чидай олмаган риёдликлар Неймарни сотиб олишга муваффақ бўлди. Роналду тараф ҳам жим қараб тургани йўқ, улар бир қанча  топ футболчиларни ўз таркибига қўшиб олмоқда. 

Митрович - "Ал-Ҳилол".

"Ал-Ҳилол" ушбу ёз давомида айрим ҳужумчилар билан музокаралар ўтказди. Аввалроқ, клуб Ромелу Лукаку, Килиан Мбаппе каби юлдузларни сотиб олишга уриниб кўрди. Аммо улар томонидан рад жавоби келгач, бошқа вариантлар кўриб чиқилди. Митровични сотиб олиш ҳам осон бўлгани йўқ. Саудияликлар бир неча бор "Фулхэм"га таклиф билан чиқди ва охири 53 миллион фунтлик келишувга эришди. Ҳужумчининг янги клуби билан тузган битими 2026 йилнинг ёзига қадар амал қилади. У йилига тахминан 17 миллион фунт маош олади. Ушбу трансфер эълон қилинган. Миш-мишларга кўра, сербиялик футболчининг кичик жароҳати бор ва қачон дебют ўйинида майдонга тушиши номаълум.

Отавио - "Ан-Наср".

Топ клубга ўтиши мумкин бўлган футболчи сифатида қаралган Отавио ҳам фаолиятини Саудия чемпионатида давом эттиришга қарор қилди. Маълум бўлишича, футболчининг ўзи билан бир ой олдин келишиб олинган. Риёдликлар энди "Порту" билан трансфер шартлари бўйича келишувга эришди. Унга кўра, "Ан-Наср" 28 ёшли португалнинг 60 миллион евролик товон пулини тўлайди. Отавио "Порту"нинг "Ференсе"га қарши учрашувида қатнашмади. Сабаби, у айни пайтда тиббий кўрикдан ўтмоқда. Тез орада ҳужумкор ярим ҳимоячи Роналдунинг жамоадоши сифатида таништирилади. Эслатиб ўтамиз, мазкур трансфер Португалия клуби учун рекорд ҳисобланади.

Ляпорт - "Ан-Наср".

"Ан-Наср" ҳимояни кучайтириш учун анча вақтдан бери ҳаракат қилиб келмоқда. Олдинроқ, "Манчестер Юнайтед" аъзоси Эрик Байи билан боғланган клуб Эмерик Ляпортни ўз сафига қўшиб олишга яқин турибди. "Манчестер Сити" бу трансферга розилик берган. "Шаҳарликлар" унинг ўрнига "Лейпциг"дан Йошко Гвардиолни сотиб олди. Хорват янги жамоасида соврин ютишга ҳам муваффақ бўлди. Мазкур харид "Ан-Наср"га 30 миллион еврога тушди. Ҳимоячи билан 3 йиллик битим имзоланади ва испаннинг маоши йилига 20 миллион евро бўлади. Ляпортга Европадан таклифлар келди. Мисол учун, унга "Барселона" қизиқиш билдириб кўрди, лекин каталонияликлар Иниго Мартинесни текинга қўлга киритишни маъқул кўрди. Шунингдек, футболчи Италия ёки Испания клубларига ўтиши мумкин эди. "Арсенал" ҳам айни пайтда жароҳат олган Юрриен Тимберга ўринбосар изламоқда. Аммо Эмерик Саудияни танлади.

Парти ва Марсьяль...

"Манчестер Юнайтед" ҳужумчиси Антони Марсьялнинг келажаги бироз сўроқ остида турибди. У ўтган мавсумнинг катта қисмини жароҳат билан ўтказиб юборди. Мавсумолди ўртоқлик баҳсларида майдонга тушмаган страйкер "Тоттенхэм"га қарши 5 дақиқа ҳаракат қилди. Айни МЮга марказий ҳужумчи керак бўлган пайтда ҳам у кам ўйин амалиётига эга бўлмоқда. Тен Хаг футболчини олиб қолишни истамаётгандек кўринмоқда. Бундан эса Саудия клублари фойдаланиб кетмоқчи. "Mirror Football" нашрининг хабар беришича, Марсьялга Арабистондан таклифлар бўлмоқда. Тез орада музокаралар бошланиши мумкин. Курашда "Вест Хэм" ҳам бор.

"Арсенал" Ромео Лавияни сотиб олиш учун ҳаракат қилаётганида таркибни Томас Парти тарк этиши керак эди. Ўша пайтда клуб ярим ҳимоячини сотувга қўйган. "Ювентус" ва Саудиянинг икки клуби "канонирлар" билан боғланди. Аммо Парти жамоани тарк этишни истамади. У чемпионлар лигасида тўп тепишни хоҳламоқда. Футболчининг Артета билан муносабатлари яхши ва "Арсенал"да қолиш эҳтимоли юқори. Фабрицио Романонинг сўзларига кўра, Лондон клубига 30 миллион евролик таклиф келди, лекин бу рад қилинди. Сабаби, раҳбарият камида 45 миллион евро хоҳлайди.