Шацкихдан бир қадам ортда қолган Бабаян ёҳуд кубок ўйини олдидан жамоалар ўйини таҳлил қиламиз!

Максим Шацкихни ўз имзоси йўқ эканлиги борасида бир неча бор фикр билдирганим рост. Сабаби, "Пахтакор" унинг бошқарувидаги "катта ўйинда" ўзини қандай ҳис қилишини кўрмаган эдим. Бир неча кун олдин Наманганда бунга гувоҳ бўлдим. Эътиборлиси шундаки, "Макс" 3 та марказий ҳимоячи билан бир чизиқда тўп сурди. Қанот ҳимоячилари (Алижонов, Сайфиев) деярли вингер даражасида юқорида ҳаракат қилди.

Асосий кучи марказ саналган "Навбаҳор" эса, 60 дақиқадан ортиқ вақт мобайнида шунчаки тўп учун прессингда куч йўқотди. Ёдингизда бўлса, биринчи таймда Сайфиев ҳисобни очишга яқин келган, иккинчи 45 дақиқаликда айнан Алижонов гол киритганди. Умуман олганда, Шацких ўйин давомида Бабаяндан бир қадам олдинда бўлди.

Жамшид Искандеров урган гол "Навбаҳор"ни муаммодан қутқариб қолди. Акс ҳолда, "Пахтакор"нинг қанот бўйлаб кенг ўйнаётгани якунда "шерлар"га 3 очко тақдим этиши мумкин эди. Водийдаги ўйинда Максим Шацкихни ўзим учун кашф этдим. Войнески ва Хюистрадан фарқли ўлароқ, у Шота Арвеладзенинг "копия" варианти эмас экан. Ўз қарашларига эгалиги хурсанд қилди.

Ўз навбатида Самвел Бабаян ҳам жим қараб тургани йўқ. Биринчи бўлимнинг ўзидаёқ тўп назорати рақиб томонга ўтиб кетаётганини сезгач, прессингда фаолроқ бўлган Маручишни Касян ўрнига жангга ташлади. Шу тариқа, "Пахтакор"нинг биринчи пас билан ҳужум бошлаб бераётган ҳимоячиларига босим ўтказилди. 65 дақиқадан ўтгач, бу босим ҳажми ошиб борди. Натижада, Азмиддинов, Мартинович ва Насонов учлигида муаммолар пайдо бўлишни бошлади. Ҳатто, бир вазиятдаги қўпол хато сабабли "шерлар" тўп ҳам ўтказиб юбориши.

Ҳисоб таблода 1:1 бўлиб турган бир пайтда, Макс таваккал қилишни истамади. Мартиновични ўйиндан олиб, 4-2-3-1 га ўтди. Натижада, "Пахтакор"нинг қанотдаги устунлиги йўқолди. "Навбаҳор" эса, 4-5-1 ни 4-4-2 га ўзгартирди.

Шу боис, сўнгги 20 дақиқада "лочинлар" меҳмонлардан яхшироқ кўринди. Хатто, гол киритиш учун имкониятлар ҳам яратди. Бу устунлик ўз-ўзидан содир бўлгани йўқ. Бабаян Жокич ва Болтабоевни соф марказий ярим ҳимоя зонасига ўтказди. Аввалроқ, Жамшид олдинроққа интилган бўлса, қолган 20 дақиқа давомида фақат марказга жавоб берди. Собиржонов ва иккинчи бўлимда ўйинга қўшилган Абдуманноповлар қанот ярим ҳимоясига ўтди. Мен, "Супер Макс" қўрққани учун 3-6-1 ни 4-2-3-1 га ўзгартирди деб ҳисобламайман. Шунчаки, заҳирада ўтирган футболчилар бу схемани активлигини оширишга мос келмайдиган позициядаги футболчилар эди. Шу боис, таваккал қилишни истамади. Бабаян эса, 1:1 натижаси ўзини 100 фоиз қаноатлантиришини ҳис этиб турди. Сабаби, "лочинлар" дуранг қайд этилгани боис, "Пахтакор"ни ўзидан ўтиб кетишига имконият қолдиргани йўқ.

Бу дурангдан кўпроқ "Навбаҳор" ютди. Жамоа буёғига очко йўқотмаса, ўзаро ўйинда уни қувиб ўтиши мумкин бўлган жамоа билан тўқнаш келмайди. "Пахтакор"да эса, бари аксинча. "Шерлар" барча ўйинларини 3 очко билан якунласада, "Навбаҳор"ни "қоқилишини" кутишга мажбур. Катта эҳтимол билан, кубок ўйини батамом бошқа атмосферада ўтади. Старт ўйин схемасини топишда енгилган Бабаяндан ўзгача юриш кўришимиз мумкин.

Аслида, "Навбаҳор" бош мураббийи консерватив инсонлар сирасига кирсада, фикримни ўзгартирмайман. Сабаби, фақат футболчиларнинг маҳорати билан бу ўйинни ютиб бўлмайди. Бу "Пахтакор" "лочинлар"нинг босимига дош бера олишини кўрсатиб қўйди. Макс эса, аксинча, янада креативроқ қарорлар қабул қилса керак. Сабаби, биринчи уриниш 100 фоиз ўзини оқлади. Олдинда икки клубдан бири қолиши керак бўлгн кубок ўйини кутиб турибди. Бу баҳсда футболдаги классика ва трендлар тўқнаш келади. Тўғриси, бу ўйинда қайси томон ғолиб чиқишини тахмин қилиш қийин. Кўпчилик биринчи "матч"даги атмосферага чалғиб қолмасин. Бу шунчаки тўфон олдидан денгизда кузатиладиган сукунат эди холос...

Яҳёхўжа Улуғхўжаев