Шомуродовга олисдаги машҳур жамоадан чорлов бор!
Тобора ривожланиб бораётган MLS қўшни мамлакатлар – АҚШ ва Канада жамоаларини бирлаштирган нуфузли мусобақа ҳисобланади. Кейинги йилларда бу чемпионатда иштирок этаётган жамоалар Европада ном қозонган футболчиларни ўз сафига қўшиб олишга алоҳида эътибор қаратмоқда.
Уммонорти футболини ёритаётган нуфузли манбалардан wakingthered.com сайти Канаданинг маншҳур клуби “Торонто”нинг трансфер сиёсати ҳақида маълумотларни мухлислар эътиборига ҳавола қилди.
Жорий мавсум торонтоликларнинг ишлари юришмаяпти. Жамоа дастлабки саккизта учрашувда тўртта дуранг қайд этган ва тўрт бор мағлубиятга учраган ҳолда ҳали бирор маротаба ғалабани нишонлагани йўқ.
MLS лигасида трансфер ойнаси 23 апрель куни ёпилади. Шу боис, “Торонто” мухлислари клуб раҳбариятидан вазиятни ўнглай оладиган футболчилар трансферини кутяпти.
“Торонто” ўтган йил охиридан бери тўрт нафар янги ўйинчини ўз сафига қўшиб олди. Улардан фақатгина ҳимоячи Зейн Манлуис тўлиқ трансфер қилинди. 21 ёшли ўйинчи Лондоннинг “Арсенал” клубининг ёшлар жамоасида тўп тўп тепган.
Қолган уч нафар ўйинчи – вингер Тео Корбеану, ярим ҳимоячи Максим Домингес ва ҳужумчи Ола Бринхильдсен кейинчалик сотиб олиш ҳуқуқи билан ижарага олинди. Булар орасида икки нафари Европа футболини кўрган чарм тўп усталари ҳисобланади. Яъни, Корбеану Испаниянинг “Гранада”, Бринхильдсен Норвегиянинг “Мидтьюлланд” жамоасидан олинди. Домингес эса, дунёга машҳур “Васко да Гама” ўйинчиси бўлган.
Мураббийлар штаби бу мавсум клубда тарбияланаётган ёшлардан Адис Де Розарио, Маркус Цимерманчич ва Лазар Стефановични асосий жамоага ўтказди.
Аммо жамоага қўшилган янги кучлар кутилган самарани бергани йўқ. Айни пайтда “Торонто” сафида Европа футболида ном қозонган икки футболчи Федерико Бернардески ҳамда Лоренцо Инсинье тўп тепмоқда. Бироқ италиялик ҳужумчиларнинг иккитадан голи ҳам жамоанинг ғалаба қозонишига етарли бўлмаяпти.
“Торонто” раҳбарияти ҳужум чизиғини кучайтириш учун бир неча футболчилар профилини ўрганиб чиқди. Қизиғи шундаки, улар орасида “Рома”да асосий фигурага айланган Элдор Шомуродов ҳам бор. Шунингдек, Канада клуби Испания терма жамоасида ўйнаган “Севилья” ҳужумкор футболчиси Сусони ҳам нишонга олган.
Жамоа бош мураббийи Робин Фрейзер бу вазиятга ойдинлик киритиб ўтди.
- Айни пайтда янги трансферлар бўйича аниқ таклифимиз ёки музокаралар бошланган ҳолат йўқ. Бунақа трансферларни бир ҳафта ичида амалга ошириб бўлмайди. Биз нишонимиздаги ўйинчиларни олиш масаласига ёзда қайтамиз, - деди Робин Фрейзер.
Таъкидлаш жоизки, MLS клублари учун иккинчи трансфер ойнаси 24 июлда очилади ва 21 августгача давом этади.
2020 йилнинг октябридан бери Италияда ўйнаб келаётган Элдор Шомуродов уммонорти клублари эътиборига тушганига анча бўлган. Ўтган йили ёзги трансферлар якунланиши арафасида АҚШнинг “Атланта Юнайтед” жамоаси ўзбек легионерини олишга жуда яқин келганди. Бироқ клуб бу айрим сабабларга кўра бу трансферни расмийлаштиришга улгурмади.
Ҳозир Элдор Шомуродов атрофидаги вазият ўзгарган. Жорий мавсумнинг иккинчи ярмида ҳамюртимизнинг ўйинида ижобий ўзгаришлар кузатилди. “Рома” раҳбарияти жамоанинг асосий фигураларидан бирига айланган 29 ёшли ҳужумчининг шартномасини 2027 йилнинг ёзигача узайтирди. Шунга қарамай, ёзги трансферлар даврида Элдор Шомуродовнинг бозори “қайнаши” кутилмоқда.
Фикрлар