Шомуродовни ортга қайтаришмоқчи...

“Кальяри” жорий мавсумда ҳам Италия чемпионати юқори дивизионида қолиш учун курашишга мажбур бўлмоқда. 

Ўтган чемпионатда сардинияликлар ҳозир “Рома” вакиллари ҳисобланган бош мураббий Клаудио Раньери ва Элдор Шомуродов ёрдами А Сериядаги ўрнини сақлаб қолган эди.

Ҳозир “Кальяри”ни Давиде Никола бошқармоқда ва бу мутахассис жамоани хавфли ҳудуддан олиб чиқиш учун январда янги ўйинчилар олиш кераклигини таъкидламоқда.

Давиде Никола биринчи навбатда ҳужум чизиғидаги муаммоларни бартараф этиш керак. Чунки голсиз натижа бўлмайди. “Кальяри” чемпионатда энг кам тўп киритган жамоалардн бири. Сардинияликлар 18 та учрашувдан тенг ярмида майдонни голсиз тарк этган. Сўнгги тўртта учрашувда Никола шогирдлари бир маротаба тўп кирита олди холос.

Нуфузли манба – La Gazzetta dello Sport нашрининг ёзишича, “Кальяри” раҳбарияти ва мураббийлар штаби жамоага фойда келтириши мумкин бўлган ҳужумчи сифатида Элдор Шомуродовни танлади.

- Ўзбек легионери “Кальяри”нинг ҳужум чизиғидаги муаммоларига яхши ечим бўлиши мумкин. Ёзда ижара муддати тугаб, Сардиниядан пойтахтга қайтган футболчи “Рома”даги ўйин вақти жуда чегараланган. Бу ҳолат Шомуродовнинг январда “Каоьяри”га қайтиб, жамоа ҳужум чизиғини кучайтиришига йўл очиши мумкин, - деб ёзмоқда италиялик журналист Сильвио Салимбене.

“Кальяри”нинг Элдорга қизиқиши жиддий эканини  бир неча бошқа манбалар ҳам тасдиқлаб, трансферга оид муносабатларни эълон қиляпти.

- Шомуродов ўтган мавсумда Сардинияни клуби ва унинг мухлисларида ўзидан ижобий таассурот қолдирган. Мавсумнинг муҳим палласида ўз ўйинлари, голлари ва ассистлари билан жамоанинг А Серияда қолишига ҳисса қўшганини ҳеч ким унутгани йўқ. Ўзбек футболчиси Давиде Никола учун олдинги чизиқдаги бўшлиқларни тўлдиришда яхши ечим бўлади. Чунки Элдор катта тажрибага эга, жисмонан бақувват ва ҳужумнинг бир неча позицияда самарали ўйнай оладиган чарм тўп устаси, - деб ёзмоқда tuttocagliari.net портали.

- “Кальяри” ва Элдор Шомуродовнинг янги ҳамкорлиги бўйича музокараларнинг қандай кечиши  “Рома”нинг ўйинчи бўйича якуний қарори ва молиявий вазиятга боғлиқ. Қишки трансферлар даври ўзбек легионерининг келажагини белгилашда муҳим палла бўлади. Шомуродов “Кальяри”га ўтадиган бўлса, мунтазам ўйнаш имконига эга бўлади, - деб ёздмоқда La Gazzetta dello Sport нашри.

- “Кальяри”га зудлик билан янги ўйинчилар керак. Ҳужум чизиғи гол уролмаяпти. Жамоа кетма-кет тўртта мағлубиятдан кейин хавфли ҳудуддга тушиб қолган ва ўз кучига бўлган ишончни йўқотиб қўйиши мумкин.

Клуб спорт директори Бонато “Рома”нинг захирадаги марказий ҳужумчиси Элдор Шомуродовни яна Сардинияга қайтаришга бел боғлаган ва тез кунда бу трансферни амалга оширишга киришади,  - деб маълумот чиқарди La Nuova Sardegna газетаси.

Элдор Шомуродов ўтган мавсумда “Кальяри”да ўйнаб, ўз ҳисобига учтадан гол ва ассист ёздириб қўйган эди. Бу гал 29 ёшли ҳужумчимиз А Серия ва Италия кубоги доирасида жами 9 та учрашувда иккита гол ва битта ассист муаллифи бўлди.