Шу мураббий ишлар экан, терма жамоада ўйнамайман!

27 ёшли сенегаллик ярим ҳимоячи Пап Гейе терма жамоаси жаҳон чемпионатидан чиқиб кетганидан кейин фаолияти ҳақида баёнот берди. У амалдаги мураббийлар штаби ишлаётган вақтда терма жамоага қайтмаслигини маълум қилди.

- Ҳозирги мураббийлар штаби ишлаётган экан, мен терма жамоадаги фаолиятимни вақтинча тўхтатаман, - деди Пап Гейе.

Бу ҳақда журналист ва инсайдер Фабрицио Романо X ижтимоий тармоғида хабар берди.

Эслатиб ўтамиз, Сенегал терма жамоаси жаҳон чемпионатини 1/16 финал босқичида тарк этди. Пап Тиав бошқараётган жамоа Бельгияга мағлуб бўлиб, 1/8 финалга чиқа олмади. Сенегалликлар ўйиннинг 86-дақиқасига қадар икки тўп фарқи билан олдинда боришган, аммо уларни мусобақадан чиқариб юборган ҳал қилувчи гол 120+5-дақиқада пенальтидан киритилган.

Пап Гейе ушбу жаҳон чемпионатида 4 та ўйинда иштирок этиб, 2 та гол ва 1 та голли узатма қайд этди. У Сенегал терма жамоаси сафида жами 45 та учрашув ўтказиб, 7 та гол ва 2 та ассист муаллифи бўлган.

45 ёшли Пап Тиав Сенегал терма жамоасини 2025 йил март ойидан бери бошқариб келмоқда. Унинг раҳбарлигида жамоа 2026 йилги Африка миллатлар кубоги финалигача етиб борган.