Слот АПЛ клубини бошқаришдан бош тортди

Инглиз нашри talkSPORT хабарига кўра, Нидерландиядан бўлган мутахассис Лондон клуби таклифини рад этган. 

Жамоа раҳбарияти ҳозирда жамоага янги бош мураббий излашга киришган. Бу жараён "Фулхэм" устози Марку Силванинг кетиши эҳтимоли ортиб бораётган бир пайтга тўғри келмоқда. Португалиялик мутахассисни "Бенфика" билан боғлаётган хабарлар кўпайгани ортидан клуб янги номзодларни кўриб чиқмоқда. Шу номзодлар орасида Слот ҳам бор эди, аммо у билан келишувга эришиб бўлинмади.

Нидерландиялик мураббий ҳозирча ишсиз. У 2024 йилдан бери бошқариб келган "Ливерпул"ни тарк этганидан сўнг ҳеч бир клуб билан шартнома тузмаган. Слот қўл остида мерсисайдликлар 2024/25 йилги мавсумда Англия чемпиони бўлишга муваффақ бўлган эди.