Суперҳужумчи "Барса"га ўтмайди

«Интер» клуби ҳужумчиси Лаутаро Мартинес ёзда жамоасини тарк этмайди.

Сўнгги кунларда «Барселона» «нерадзурри» сардорини ўз сафига қўшиб олишга уринаётгани ҳақида хабарлар тарқалган, ҳатто аргентиналик футболчи билан оғзаки келишувга эришилгани айтилган эди. 

Бироқ машҳур журналист Гастон Эдул маълумотига кўра, Лаутарони Каталонияда кутишга ҳозирча асос йўқ. «Сине-гранатлилар» ҳақиқатан ҳам Мартинес номзодига қизиқмоқда, аммо улар томонидан ҳеч қандай расмий таклиф юборилмаган.

Лаутаро Мартинеснинг «Интер» билан амалдаги шартномаси 2029 йил ёзигача мўлжалланган. Transfermarkt портали унинг трансфер қийматини 85 миллион евро атрофида баҳолаган. Бугун эса аргентиналик форвард 29 ёшини нишонламоқда.

«Барселона» учун узоқ вақтдан буён асосий трансфер мақсадларидан бири Хулиан Альварес бўлиб келаётганди. Бироқ «Атлетико» раҳбарияти ўз юлдузини тўғридан-тўғри рақобатчи клубга сотиш нияти йўқлигини қатъий билдирган.