Суперклуб: Сен секин кетавер!

«Тоттенхэм» жамоасида тўп суриб келаётган бразилиялик ҳужумчи Ришарлисон клубни эркин агент сифатида тарк этиши мумкин. Бу ҳақда talkSPORT нашри хабар берди.

Манба маълумотига кўра, лондонликлар ҳужумчи билан шартномани муддатидан олдин бекор қилиш вариантларини кўриб чиқмоқда. Сабаби, жамоанинг бош мураббийи Роберто Де Дзерби Ришарлисонни келгуси режаларида кўрмаяпти.

Ўтган ёзда Ришарлисон «Эвертон» сафига қайтиши мумкин эди, аммо ўша пайтдаги келишув амалга ошмай қолган. Ҳозирда унга Туркиянинг «Трабзонспор» клуби жиддий қизиқиш билдирмоқда. Томонлар шартнома шартларини келишиб ҳам олган, бироқ Туркияда трансфер ойнаси ёпилиб бўлган. Шу боис «Тоттенхэм» ҳужумчи билан шартномани бекор қилиши ва унга янги клубга эркин агент сифатида текин ўтиш имконини бериши эҳтимол қилинмоқда.

29 ёшли Ришарлисоннинг амалдаги шартномаси 2027 йилнинг ўрталаригача мўлжалланган. Transfermarkt портали футболчининг бозор қийматини 25 миллион евро атрофида баҳоламоқда.