Суперлига. Биринчи даврада 225 та гол киритилди ёхуд рақамлар гапирганда!

Суперлигада биринчи давра ўйинлари ўз якунига етди. Айрим жамоалар ҳақиқий сюрпризга айланган бўлса, бошқа клублар ўзларидан кутилган натижани кўрсата олишмади. Бугун сизларга миллий чемпионатимизнинг ортда қолган қисми таҳлилини тақдим этамиз. 

1-даврада бўлиб ўтган 91 та ўйинда жами 225 та тўп киритилди. Бу ўтган йил билан солиштирганда  23 та голга кўп деганидир. 2023 йилги мавсум Суперлиганинг илк даврасидан сўнг дарвозалар 202 маротаба ишғол этилганди. 

Бўлиб ўтган 13 та тур давомида энг кўп ўйинда ғалаба қозонган жамоалар сони 3 тани ташкил этади. “Насаф”, ОКМК ва “Сўғдиёна” 7 тадан беллашувларни ўз фойдаларига ҳал этишган. Энг кам ютуққа эришган жамоа эса Бекободнинг “Металлург” клуби саналади. Афсусланарли, аммо факт бўлган жиҳати шуки, улар ҳали ғалаба нималигини билмай келишмоқда - 13 учрашувда 7 дуранг ва 6 мағлубият. 

Юқорида “Металлург”нинг ҳали ҳамон ғалабалар ҳисобини оча олмаганини айтиб ўтдик. Бироқ, рақиб жамоаларга “Робин Гуд” вазифасини бажариб, тинмай очко улашаётган клублар орасида бекободликлар йўқ. 33 миллий чемпионатимизнинг биринчи даврасидан кейин энг кўп мағлубиятга учраганлар сифатида Тошкентнинг икки клуби - “Локомотив” ва “Бунёдкор” бормоқда. Улар нақд 7 тадан беллашувда майдонни боши эгик ҳолда тарк этишган. Мағлубиятларга энг кам учраган жамоалар сони эса атиги 1 та. Бу “Насаф” жамоаси. Қаршиликлар фақат 11-турда мавсумнинг кашфиёт жамоаси - “Сўғдиёна”га мағлуб бўлишган. 

2023 йилги мавсумда “Нефтчи” клубининг дуранглар сериясига тушиб қолганлиги аксар мухлисларнинг муҳокамасидаги бош мавзуга айланиб қолган эди. Бу йил ана шу мавзу марказида водийнинг икки клуби- “Андижон” ва “Навбахор”, шунингдек, тепада номи тилга олинган “Металлург” жамоалари боришмоқда. Мазкур 3 жамоа 7 тадан беллашувда “конкурентлари” билан муроса кўчасини танлашган. Дурангларга унча-мунча ҳолатда рози бўлмайдиган яъни, энг кам дуранг ўйнаган жамоалар эса 2 тани ташкил этади. ОКМК ва “Сўғдиёна” рақиблари билан очко бўлишишдан кўра, ёки ғалаба қозонади, ёки мағлуб бўлишни афзал билишган. Олмалиқликлар ҳам жиззахликлар ҳам атиги 2 маротаба рақиблари билан муроса кўчасини танлаган.

Ҳозирга қадар 23 та тўп киритиб, чемпионатнинг энг сермаҳсул жамоаси яна ўша “Сўғдиёна” бўлиб турибди. Шунча голнинг 1/3 қисмидан ҳам кўпроғи 9 та гол билан тўпурарлар рўйхатини бошқариб бораётган Люпче Дориевга тегишли. Болқонлик моҳир хужумчини шак-шубхасиз мавсумнинг 1-рақамли кашфиёти десак муболаға бўлмайди. “Бунёдкор” эса 8 тагина киритилган тўп билан биринчи давранинг энг кам тўп киритган клуби саналади. Биргина Люпче Дориевнинг ўзи бутун бошли “қалдирғочлар”дан кўра кўпроқ ўз номини таблога ёздириб қўя олган. 

Ҳимоячилари рақиб ҳужумчиларига яхшигина бошоғриқ бўлиб, дарвозаси даҳлсизлигини сақлаб қолишда катта ҳисса қўшаётган клублар сони ҳам унчалик кўп эмас. Фақатгина Қаршининг “Насаф” жамоаси қолган клубларга нисбатан ўз дарвозасидан анча кам - 9 та гол қўйиб юборишган. Бу борада уларга сал яқинроқ кўрсаткичга эга клуб олимпия терма жамоасининг асоси ҳисобланган “Олимпик” саналади. 12 та ўтказиб юборилган гол билан улар мазкур кўрсаткич борасида иккинчи натижага эга. Дарвозасини “Буюк ипак йўли” карвонсаройининг очиқ эшиклари каби деб ўйлайдиган жамоалар хам биринчи даврада етарлича топилди. Мавсумнинг энг беқарор клубларидан бири саналган “Бунёдкор” юқоридаги таърифларга тўла мос тушади. Улар 13 беллашувда нақд 24 та тўп ўтказиб юборишган. Бу хар бир ўйинда ўртача 2 тага яқин гол деганидир.
 

Якунига етган биринчи давра ҳақида қизиқарли маълумотлар ҳозирча шулардан иборат. Иккинчи давра беллашувлари эса 2 август санасидан давом эттирилади. Шу куни “Қизилқум” ва “Бунёдкор” қарама-қаршилиги билан танаффус олган Суперлига баҳслари яна ўз рельсига тушиб олади. Шунингдек, Ўзбекистон проффесионал футбол лигасининг(ЎзПФЛ) келаси ой учун кичик тақвими эълон қилинди. Тақвим эълони берилган хабарда август ойида айрим ўйинларга ўзгартириш ва қўшимчалар бўлиши мумкинлиги ҳам қайд этиб ўтилган. Ҳабарнинг тўлиқ мазмуни эса қуйидагича кўриниш олган:

“Лига биринчи галда U23 Ўзбекистон термасининг Париж Олимпиадасидаги иштирокидан келиб чиқди. Масалага оптимистик руҳда ёндашиб, термамизнинг ½ финалга қадар етиб бориши мумкинлиги инобатга олдик.

Лига "Сурхон" арена майдони ва унда алоҳида ВАР хонасининг ишга тушиши масаласи катта эҳтимол билан август ойига қадар тайёр бўлмаслиги масаласини кун тартибига киритди. 

"Локомотив" ва "Пахтакор" стадионларини таъмирлаш зарурияти бор эканлиги ҳисобга олинди. Бунда Самарқанд шаҳридаги "Динамо" стадионини фойдаланишга қайта топшириш масаласи муҳим аҳамият касб этади. 

Аксар ҳолатларда бир стадиондан икки клуб фойдаланаётганини инобатга олиб, ўйинлар орасидаги танаффус ва майса парвариши масаласини ҳам эътибордан четда қолдириб бўлмайди. 

Шу ва бошқа қатор сабаблар инобатга олиниб, август ойи учун режа ишлаб чиқилди. Лига бунда ҳар бир деталга эътибор қаратишга интилди”, - дейилади хабарда.

Демак, бизни келаси ойда ҳам кубок, ҳам чемпионат доирасида бир-биридан қизиқарли беллашув ва қарама-қаршиликлар кутиб турибди. Буларнинг барчасидан эса интернетдаги веб саҳифамиз  ва ижтимоий тармоқлардаги расмий каналларимиз орқали боҳабар бўлиб боришингиз мумкин. 

                                                                                                                                                Ҳумоюнмирзо Эргашев.