Суперлигада кутилган ва кутилмаган натижалар бошланди

Суперлигада дастлабки учта тур ортда қолди. Фақатгина 1-турда бўлиб ўтиши керак бўлган “Пахтакор” – “Машъал” 2 апрель санасига қолдирилган. Учта турдан кейин дастлабки хулоса ва тасаввурлар уйғонмоқда. Аниқроғи, кутилган ва кутилмаган натижалар бошланди.

ОКМКда 100 фоизли натижа

Миржалол Қосимов бош мураббийлик қилаётган ОКМК клуби ўтган йил чемпионатнинг стартидан фарқли ўлароқ бу сафар муваффақиятли бошлади. 1-турда ўз майдонида “Бухоро” 2:1 ҳисобида мағлуб этилди. Ўшанда охирги дақиқаларда Али Абдураҳмонов ҳал қилувчи голни уриб кетди. 2-турни ҳам ўз майдонида ўтказган олмалиқликлар бу сафар “Пахтакор”ни таслим қилдилар – 2:0. 3-турда эса ОКМК меҳмонда “Қизилқум”ни 1:3 ҳисобида енгиб қайтди. Тўғри, Қосимов жамоаси учта турдан иккитасини ўз майдонида ўтказди. Аммо рақиблардан бири “Пахтакор” эди ва жамоа улардан ҳам устун кела олди. ОКМК ортиқча шов-шувларсиз мавсумга тайёрланди ва аста-секин ўзи учун керакли очколарни йиғишни бошлади. Кутилганидек, ОКМК Суперлигамиз етакчиларидан бири.

Ажаблантираётган “Сурхон”, “Сўғдиёна” ва “Пахтакор”

Ҳа, дарҳақиқат мазкур клублар ажаблантирмоқда. “Сурхон” ҳам, “Сўғдиёна” ҳам “чақилмас ёнғоқ” каби аниқ тасаввур пайдо қила олган жамоалар саналишади. Жиззахликлар қишда БАА ва Туркияда йиғин ўтказиб келди. Бош мураббий Иван Бошкович жамоаси билан совринлардан бирини ютмоқчи. Бироқ жамоа кутилмаганда дастлабки учта турдан кейин ҳисобида 0 очко (!). Аввалига Қаршида “Насаф”га 1:0 ҳисобида енгилди. Кейинги иккита турда эса Жиззахда мухлислари кўз ўнгида аламли мағлубиятларга учради. “Навбаҳор”га 2:3, “Машъал”га 0:1 ҳисобларида мағлубиятга учради. 4-турда Бошкович жамоаси “Пахтакор”ни қабул қилади.

“Сурхон” ҳам руҳий ўрага тушиб қолган. “Қизилқум”га қарши 2:0 ҳисобидаги мағлубият билан бошлаган термизликлар бир неча йиллик танаффусдан сўнг Термизга қайтди. Бироқ “Хоразм”га 0:2 натижасида ютқазиб қўйди. 3-турда бўлса, Тошкентда “Бунёдкор”га кучи етмади. Лекин ўтган йили ҳам “Сурхон” стартни яхши бошлай олмаганди, кейинчалик ўзига келганди. Кўрамиз, бу сафар қандай бўларкин? Бунинг учун 4-турда “Сурхон” Термизда “Қўқон-1912” қаршилигини енгиши керак бўлади. Лекин Февзи Давлетов устозлик қилаётган “Сурхон” ўйинини ўзгартирмаса, айниқса, ҳимоя чизиғини мустаҳкамламаса бўлмайди. 3 турдан кейин 7 та тўп ўтказиб юбордилар ва бу ҳозирча Суперлигада энг ёмон натижа бўлиб турибди.

Португалиялик мураббий бошчилигидаги “Пахтакор” кетма-кет иккита учрашувда ютқазиб, ажаблантирди. Юқорида айтганимиздек, илк турдаги учрашуви қолдирилганди, кейинги иккита турда Олмалиқда ОКМКга, Тошкентда “Динамо”га имкониятни бой бериб қўйди. “Пахтакор”га нима бўляпти, деган ҳақли савол туғилмоқда. Афтидан, янги хорижлик мутахассис ўзининг ўйин фалсафасини сингдиришда муаммоларга дуч келаётганга ўхшайди.

Энг кучли футболчиларни йиғиб олган “Нефтчи”га нима бўляпти?

Ҳа, қишки селекция чоғида трансферларни “портлатган” ва таркибига Ўзбекистондаги энг кучли ҳамда қиммат нархдаги футболчиларни қўшиб олган “Нефтчи”нинг мақсади аниқ: чемпионликни ва Кубокни ютиш. Қолаверса, таркибга чемпионатимиздаги энг яхши легионерлар ҳам қўшиб олинган. Лекин дастлабки учта турда фақат дуранг ўйнашини кутганмидингиз? Биринчи турда Тошкентда “Бунёдкор” билан 2:2 қайд этган жамоа иккинчи турда ўз уйида “Қўқон-1912”ни енгга олмади - 0:0. Учинчи турда эса Қаршида “Насаф” билан баҳсда ҳам дарвозалар дахлсиз қолди.

5 апрель санасида фарғоналиклар ўз уйида водий дербисида “Навбаҳор”ни қабул қилади. Бош мураббий Виталий Левченко юлдузли таркиб билан ўзининг ўйин услубини қуриб битказмаган кўринади. Агар мана шундай очко йўқотишлар давом этаверса, бош мураббийга чиқиш эшиклари кўрсатилмайди, деб ким кафолат бера олади? Аммо ҳозирданоқ бундай кучли таркиб билан 6 очкони йўқотган “Нефтчи”га бу чемпионат охирида қимматга тушиши мумкин. Жамоа ўйини инқироз ҳолатидами ёки юлдузли таркиб ҳали бир-бирини тўлиқ тушунмаяптими? Ҳар қандай ҳолатда ҳам натижа учун асосий жавобгар Левченко! “Навбаҳор” билан ўтадиган дерби фарғоналиклар учун қандай аҳамиятга эгалигини ўзлари чуқур ҳис қилиб туришибди.