Тез орада эълон қилинадиган трансферлар!
Трансферлар ойнаси ёпилишига ҳам кам вақт қолди. Клублар ҳам буни сезган ҳолда, активликни оширмоқда. Айни дамга келиб, бир қанча трансферлар амалга ошиш эҳтимоли юқори бўлиб турибди. Мисол учун, "Ланс" янги ҳужумчи сотиб олишга яқин, Зиешнинг ва ниҳоят кейинги манзили аниқ, "Ньюкасл" "Челси"дан футболчи олмоқчи, россиялик футболчи Ла Лигага йўл олган, Адамс АПЛга қайтмоқчи ва ҳоказо.
Элье Ваи - "Ланс"
"Монпелье" таркибида ўтган мавсум 19 та гол урган ҳужумчининг бу ёзда харидорлари кўпайди. Футболчига бир қатор топ клублардан қизиқишлар бўлган. Аммо Ваи учун "Айнтрахт" ҳаммадан кўп харакат қилди. Шахсий шартлар бўйича келишувда муаммо йўқ эди, лекин Германия клуби таклиф қилган 20 миллион еврога французлар рози бўлмади. Шундан сўнг курашга "Ланс" қўшилди ва 35 миллион евролик таклиф билан чиқди. Бу эса "Монпелье"га маъқул келиб, ҳужумчини қўйиб юборди. Ваи янги клуби билан 5 йиллик шартнома имзолайди. "Ланс" Лоис Опенда кетганидан кейин янги страйкер излаётганди. Улар орасида Чемпионшип тўпурари Чуба Акпом ҳам бор эди. Англиялик ҳужумчи эса "Аякс"га ўтди.
Тайлер Адамс - "Борнмут"
"Лидс" Премьер-лигадан Чемпионшипга тушиб кетганидан кейин футболчиларига яхши таклиф келса, уларни қўйиб юбормоқда. Шундай ўйинчилар орасида америкалик ярим ҳимоячи Тайлер Адамс ҳам бор. У "Челси"га ўтишга жуда яқин келганди. Томонлар келишувга эришиб, тиббий кўрикдан ўтиш санаси ҳам маълум эди. Аммо Кайседо ва Лавия трансферлари сабаб "аристократлар" Адамсдан воз кечди. Тайлерга шундан сўнг айрим клублардан қизиқишлар бўлган. Улар орасида "Борнмут" чаққонлик қилиб, ярим ҳимоячи билан шартнома имзолаш арафасида. Бу трансфердан "Лидс" 20 миллион фунт ишлаб олади.
Льюс Холл - "Ньюкасл"
Ушбу ёзда ақл билан трансферлар ойнасида ишлаётган "Ньюкасл" ўз таркибига "Челси"дан ёш, потенсиали юқори футболчини ўз таркибига қўшиб олишга яқин. Холл фаолиятини ярим ҳимоячи сифатида бошлаган. Аммо ўтган мавсум лондонликларга чап қанот ҳимоячи керак бўлиб қолган пайт ушбу позицияда ҳаракат қилди. Ундан Хоу қандай фойдаланиши ҳозирча номаълум. Льюсни "Ньюкасл" 35 миллион фунтга сотиб олиш шарти билан бир мавсумга ижарага олади. Футболчи тиббий кўрикдан ўтиб бўлди, тез орада трансфер эълон қилиниши кутилмоқда.
Арсен Захарян - "Реал Сосьедад"
"Динамо Москва"нинг 20 ёшли ярим ҳимоячиси Захарян фаолиятини топ-5 чемпионатларда давом эттиришни истади ва Ла Лига клубида тўп тепадиган бўлди. "Челси" ушбу футболчига ҳам оғиз солиб кўрди. Аммо "аристократлар" бошқа вариантларни кўриб чиқишни танлади. Арсенга эса "Реал Сосьедад"дан жиддий таклиф келди ва футболчи клубга розилик берди. Захарян сан-себастиянликлар билан 5 йиллик шартнома имзолайди. Транссфер 13 миллион евро эвазига амалга ошмоқда.
Ҳаким Зиеш - "Галатасарой"
Энг омадсиз футболчилардан бири бўлиб турган Зиеш ва ниҳоят ўзига янги клуб топди. Унинг кейинги манзили Туркия бўлади. Аввалроқ, ярим ҳимоячи "Челси" билан ушбу ёзда эркин агент сифатида жамоани тарк этиш бўйича келишиб олганди. Футболчи "Ан-Наср"га ўтишга яқин келди. Аммо унинг тиббий кўрикдан ўта олмагани сабаб, бу трансфер барбод бўлди. Қишда эса ПСЖ билан шунга ўхшаша ҳолат бўлганди. Зиеш айни пайтда Истанбулга етиб келган. Тез орада у клуб билан неча йиллик шартнома имзолагани маълум бўлади. Катта эҳтимол билан, бу сафар ҳеч қандай муаммо бўлмайди. "Шерлар" Никола Заньолони "Астон Вилла"га кетгани сабаб Ҳакимни ўз сафига қўшиб олишга қарор қилган.
Фикрлар