“Тоттенхэм” АПЛда қолса-қолмаса, учта юлдуз кетади

Кучли таркиб жамлаганига қарамай, Англия Премьер-лигасида қолиш учун курашаётган “Тоттенхэм” ёзги трансферлар ойнаси даврида етакчи ўйинчиларини йўқотиши кутилмоқда.

Ҳозир қийин даврни бошдан кечираётган лондонликлар қуйи лигага тушиб кетиш зонасидан атиги бир очко олдинда бормоқда. The Touchline нашри хабарига кўра, агар жамоа Премьер-лигадан тушиб кетса, бошқа клублар жамоанинг етакчи ўйинчиларини олиб кетади.

Шу билан бирга, учта юлдуз футболчи жамоа АПЛда қолиш-қолмаслигидан қатъи назар, бу ёзда “Тоттенхэм”ни тарк этишга қарор қилган.

Ҳимоячилардан Кристиан Ромеро ва Микки ван де Вен ҳамда ҳужумчи Ришарлисон “Тоттенхэм”дан кетишни мўлжаллаяпти. Бу ўйинчиларнинг ҳар бирига бир нечтадан харидор бор.

24 ёшли Микки ван де Веннинг трансфер баҳоси 65 миллион евро ташкил қилса, 27 ёшли Ромеро 60 миллион еврога баҳоланган. 28 ёшли Ришарлисонни оладиган клублар 28 миллион евродан кўпроқ маблағ сарфлашига тўғри келади.