УЕФА нега Чемпионлар лигаси форматини ўзгартирди?

"Арсенал" ва "Зенит" клубларининг собиқ ҳужумчиси Андрей Аршавин УЕФА Чемпионлар лигасининг янгиланган формати ҳақида ўз фикри билан ўртоқлашди.

“Бу Чемпионлар лигасида кўпроқ ўйинлар бўлиши, жамоалар кўпроқ пул ишлаб олиши учун қилинган. УЕФА бошқача ҳаракат қила олмасди. Улар бой клубларни хурсанд қилиш учун ҳамма нарса қилиши керак", - деди россиялик футбол юлдузи Спорт-Экспресс нашрига берган интервьюсида.

УЕФА жорий мавсумдан бошлаб Чемпионлар лигаси форматига ўзгартиришлар киритди. Унга кўра, гуруҳ босқичида 32 та эмас, 36 та жамоа иштирок этмоқда. Мусобақа гуруҳларга бўлиниш ўрнига, ягона турнир жадвали асосида ўтказилади. Якунда ушбу жадвал натижаларига кўра плей-офф жуфтликлари шакллантирилади.