“US Open - 2020”: Бахтсизликнинг чеки борми?

АҚШ очиқ чемпионатининг эркаклар ўртасидаги финалида австриялик Доминик Тим германиялик Александр Зверевга қарши кортга чиқади.

Ярим финал босқичида Тим россиялик Даниил Медведевни 6:2, 7:6, 7:6, Зверев эса испаниялик Пабло Каррено-Бустани 3:6, 2:6, 6:3, 6:4, 6:3 ҳисобида мағлубиятга учратди.

Бўлажак учрашув Доминик Тим учун “Катта дубулға”даги тўртинчи финал бўлади. Ҳал қилувчи беллашув олдидан австриялик теннисчи ўз фикрини билдирди.

- Биз Саша билан ҳаётда дўст, кортда рақибмиз. Агар ғолиб чиқсам, бу мен учун биринчи “Катта дубулға” соврини бўлади. Ютқазсам, дарров машҳур теннисчи Энди Маррейга қўнғироқ қиламан, - деди Доминик Тим.

Гап шундаки, “Катта дубулға” турнирларининг уч карра ғолиби Энди Маррей ҳам бу мусобақаларда кетма-кет тўртта финални бой берган. Доминик Тим ҳозиргача “Ролан Гаррос” супертурнирида икки марта Рафаэль Надалга, Австралия очиқ чемпионатида бир марта Новак Жоковичга ютқазиб қўйган.

Матнда хатолик топсангиз, ўша хатони белгилаб, бизга жўнатинг (Ctrl + Enter)