Устунлик "Машъал"да, амалдачи?

Кеча Суперлигада 17-турга старт берилди. Бугун яна иккита ўйин бўлиб ўтади. Наманганда "Навбаҳор" "Сўғдиёна"ни қабул қилса, "Машъал" Ғузорда "Динамо"ни қабул қилади. 

Айни пайтда "Машъал" 15 очко билан турнир жадвалида 13-ўринни банд этиб турган бўлса, "Динамо" 30 очко жамғариб 5-ўринда боряпти. Ўтган турда самарқандликлар ўз уйида "Навбаҳор"га қарши беллашувда тайёр ғалабани қўлдан чиқариб аламли дуранг қайд этди. "Машъал" эса Ғузорда "Пахтакор"ни қабул қилди. Гарчи муносиб қаршилик кўрсатган бўлса-да, 0:1 ҳисобида мағлубиятга учради.

Тан олиш керак ўйин сифати бўйича "Динамо" кучлироқ. Устига-устак "Машъал"да бош мураббий ўзгарганини биласиз. Асрор Алиқулов ўрнини Отабек Нарзуллаев эгаллади ва у дебютини мағлубият билан бошлади. Энди кетма-кет мағлубиятларга Нарзуллаев рози бўлмаса керак. У анча тажрибали бўлган рақиби ва унинг устози Абрамовга қарши балки сюрприз тайёрлаётгандир, нима дейсиз?!

Фақат "Машъал" "Динамо"га қарши баҳсда янада кучлироқ ва жамоавий тарзда ўйин намойиш этиши керак бўлади. Акс ҳолда Абрамов жамоаси рақибини кечириб ўтирмаса керак. Томошабоп ўйин бўлиши кутилаётгани рост. Лекин меҳмонларга нисбатан "Машъал"да босим кўпроқ. 

Жамоаларнинг ўзаро ўйинлар статистикасига қарайдиган бўлсак, миллий чемпионатда 39 бор куч синашишган. Натижалар "Машъал" клубининг устунлигини кўрсатмоқда.

Муборакликлар 19 ўйинда ғалаба қозонишган, 4 учрашув дуранг билан якунланган. Самарқандликлар эса  16 бор рақибини мағлуб этган. Тўп киритиш борасида ҳам устунлик “Машъал” томонида – 43:43 Ўзаро ўйинларда “Динамо” 52, “Машъал” 61 очкони ўз ҳисобларига ёзиб қўйишган. 

“Машъал”нинг “Динамо” устидан қозонган энг йирик ғалабаси – 4:1. “Динамо”нинг “Машъал” устидан ўзаро ўйинлардаги энг йирик муваффақияти эса 5:0 ни ташкил қилади.

Статистикада устунлик қилаётган "Машъал" бу сафар яна амалда буни кўрсата оладими-йўқми? Буни биргаликда кузатамиз.

Дарвоқе, "Динамо" ҳам ушбу баҳсда ёлғиз бўлмайди. Маълум бўлишича, сафарда ўтадиган бугунги муҳим баҳсда Самарқанддан Ғузорга борадиган юзлаб мухлислар «Динамо» жамоасини стадионда қўллаб-қувватлаши кутилмоқда.

Эслатиб ўтамиз, ушбу ўйин «Спорт» телеканали орқали соат 20:00 да жонли эфирда намойиш этилади.