Винисиус яна ишкал чиқарди

Испания чемпионатининг 17-турида “Реал” Жуд Беллингем ва Килиан Мбаппенинг биттадан голи эвазига “Севилья” устидан 2:0 ҳисобида зафар қучди.

Учрашувни бошланғич таркибда бошлаган Винисиус Жуниор бу гал ҳам гол уролмади ва 83-дақиқада захирага олинди. Фанатлар у майдонни тарк этаётган пайтда ҳуштакбозлик қилишди.

Винисиус Жуниор бу гал ҳам захирага олинишини оғир қабул қилди.

Учрашувдан кейин бразилиялик футболчи ижтимоий тармоқлардаги саҳифасидан “Реал”  футболкасини ушлаб турган суратини олиб ташлаб, профилига Бразилия миллий жамоаси либосидаги расмини жойлади.

Шунингдек, Винисиус “Реал”нинг ўйинидан кадрни алоҳида пост сифатида жойлаб, уни уч нуқта билан ифодалади.

Таъкидлаш жоизки, Винисиус октябрь ойининг биринчи ярмидан бери гол уролмади. 25 ёшли бразилиялик футболчи жорий мавсумда барча мусобақаларда 23 та учрашувда қатнашиб, 5 та гол ва 8 та голли узатмани ўз ҳисобига ёздириб қўйган.

Хаби Алонсо “Реал” мухлисларининг Винисиус Жуниорга ҳуштакбозлик қилаётганини бу ҳолат уларнинг ҳаққи, дея изоҳлади.