Винисиусни йўқотиш керак!

Испания чемпионатининг 35-турида “Реал” футболчилари Каталонияга сафар уюштириб, ашаддий рақиб “Барселона” майдонидан аламли мағлубият билан қайтди.

Гарчи мадридликлар ўйин бошидаёқ иккита тўп киритган бўлса-да, мезбонлар ирода кўрсатиб, беллашувда 4:3 ҳисобида зафар қучди.

Учрашувдан кейин “Реал”нинг собиқ футболчиси Альваро Бенито бразилиялик ҳужумчи Винисиус Жуниорни кескин танқид қилди.

- Винисиуснинг майдондаги аҳволини таърифлашга сўз ожиз. Бу шунчаки, шармандаликдан бошқа нарса эмас. Карло Анчелотти Винисиусни нима қилиши керак? Албатта, уни таркибдан йўқотиши ва ўйиндан олиб ташлаши лозим.

“Реал”ни қабул қилиб оладиган мураббийнинг иши жуда кўп бўлади. У айрим ўйинчиларнинг менталитетини ўзгартириши, қайта тарбиялаши лозим.  

Винисиусдек футбол ўйнаш мумкин эмас. У жамоаси ҳимоясини фақат кузатиб беради, ортга қайтмайди, тўпни олиб қўйиш ва прессингга ҳаракат ҳам қилмайди, - деди Альваро Бенито.

Таъкидлаш жоизки, Винисиус Жуниор “Барселона”га қарши учрашувда Килиан Мбаппега иккита голли пас узатди ва 88-дақиқада захирага олинди.