“Воҳанинг зўри ким?”, “Ҳаёт гуруҳи” ва Мураккаб аҳволда қолган “Навбаҳор! Ўзбекистон кубоги гуруҳ босқичида бизни қандай ўйинлар кутмоқда?

Ўзбекистон кубогининг гуруҳ босқичига қуръа ташланганидан хабарингиз бор. Хўш, квартетда қандай эътиборга молик қарама-қаршиликлар бизни кутиб турибди? Бугун, гуруҳлардаги вазият ва жамоаларнинг имкониятларига тўхталиб ўтамиз.

А гуруҳи

“Андижон СГС”, “Гиждивон”, ОКМК, (Саралашнинг 1 ғолиби)

Ҳали гуруҳ тўлиқ бўлмасада, Шохруҳ Ишанов бошқарувидаги “Андижон СГС”ни ўйинларини томоша қилиш кўпчилик учун қизиқ бўлиши аниқ. Шунингдек, “Ғиждувон” ҳам кубок ўйинларида кейинги босқичга йўл олиш учун курашиб кўради. Ҳар ҳолда, Про Лига вакилларида кейинги босқичда иштирок этиш учун яхши имконият бор. Саралашдан катта эҳтимол билан биринчи лига вакили чиқиб келишини тахмин қилсак, иккинчи ўрин учун кураш айнан улар ўртасида бўлиши мумкин. ОКМК эса, “А” гуруҳининг яққол фаворит.

Б гуруҳи

“Сурхон”, “Машъал”, “Қўқон 1912”, “Насаф”

3 воҳа клуби қуршовида қолиб кетган “Қўқон 1912”ни қандай ҳолатда эканлигини кўриб олиш учун идеал имконият. Икки Суперлига ва яна шунча Про Лига вакиллари жам бўлган гуруҳда иккинчи ўрин учун жанг супер даражада бўлиши аниқ. Ўз-ўзидан “Насаф” қоғозда яққол етакчи эканлиги кундек равшан. Хўш, Токов, э йўғэ Арсланов қўл остидаги “Сурхон” Про Лиганинг анчагина дадил жамоаларига қарши ўйинда ўзини қандай тутади? Мана шу саволнинг жавобини топиш учун ҳам “Б” гуруҳини мунтазам кузатиб боришга тўғри келади.

C гуруҳи

“Металлург”, “Униред”, “Униред”, “Бунёдкор”

Бечора “Униред”га қуръа анчагина омадсиз келди. Бир йўла 3 та Суперлигадаги клублар билан “жанг” қилишга тўғри келади. Боз устига, уч рақиб ҳам элитадаги катта номлардан саналади. “Бунёдкор” янги мураббий қўл остида яхши дебют қилган бўлса, “Нефтчи” совринли ўринлар учун “жанг” қилиши мутахассислар томонидан таъкидланмоқда. Ҳатто, “Металлург” ҳам 3 ўйиндан иборат гуруҳ босқичида фурор кўтариши мумкин. Шундай экан, катта эҳтимол билан бу квартетдан кейинги босқичга Суперлига вакиллари йўл олади чоғи.

Д гуруҳи

“Бухоро”, “Турон”, “Янгиер”, “Шўртан”

Янги мавсумни ўзаро ўйин билан очиб олган “Бухоро” ва “Турон” кубокда ҳам тўқнаш келади. Ўтган мавсумда Про Лигани ёндирган жамоаларни яна бир қарама-қаршилик кутиб турибди. Шунингдек, биринчи лигага “бадарға” қилинган “Янгиер” ва Про Лигада аъзоси – “Шўртан” жамоалари тўқнашуви ҳам кўпчиликнинг эътиборидан четда қолмаслиги аниқ. “Турон” ва “Бухоро” гуруҳ ғолиблиги учун асосий даъвогар. Қолганлар кучи етганча “жанг” таклиф қилиши мумкин, аммо кучлар тенг эмасдек туюлмоқда. Яна билмадим. Барчасини вақт кўрсатади.

Э гуруҳи

“Динамо”, “Қизилқум”, “Локомотив”, “Зомин”

Мана буни ҳақиқий “болта-чопқи” гуруҳ десак, адашмаган бўламиз. Биринчи лига томонларга “аразлаб” кетган “Зомин”нинг кейинги босқич учун имкониятлари жуда паст, аммо қолган учлик деярли бир хил ҳолатда. Тўғри, “Қизилқум” бир қарашда элитада бўлгани учун фаворитдек кўринади, аммо аслида барчаси бошқача якунланиши ҳеч гап эмас. Вадим Абрамов ва Денис Користиченко бошқарувидаги жамоаларини кайфияти аъло. Навоийликлардан фарқли ўлароқ, уларни таркиби ўзгаришларсиз сақлаб қолинган. Жамоавий ўйин бобида ҳам пастдаги икки клуб “Қизилқум”га муаммо туғдириши аниқ. Шундай экан, бу гуруҳда бир йўла икки Про Лига вакили плей-офф йўлланмасига эга чиқса, ҳайрон бўлиб юрманг.

Ф гуруҳи

“Андижон”, “Олимпик”, “Навбаҳор”, (Саралашнинг 2 ғолиби)

Очиғи саралашда ғалаба қозониб гуруҳ босқичига йўл олган иккинчи жамоага ҳавас қилиб бўлмайди. Бир эмас, 3 та катта амбицияга эга Суперлига клублари қўлда қурол билан уни кутиб олиши аниқ. Хўш, бу квартетда ким фаворит? Қизиқ савол. Чемпионат стартини 3 клуб ҳам аъло даражада бошлади. Трансфер компаниясини ҳам бирдек фаол ўтказди. Деярли бир хил имкониятга эга. Шунга қарамай, “Навбаҳор” бу гуруҳда биринчи ўрин учун асосий даъвогардек туюлмоқда. “Андижон” ва “Олимпик” плей-оффга бериладиган иккинчи йўлланма учун аёвсиз кураш олиб боришини эҳтимоли юқори. Ҳар ҳолда ҳозирги ҳолатдан келиб чиқиб қилинган тахмин шундай. Мусобақага бўлган муносабат қайсидир жамоада ўзгарса, бу натижага ҳам таъсир қилмай қолмайди.

Г гуруҳи

“Арал”, “Дўстлик”, “Пахтакор”, “Суғдиёна”

Қорақалпоғистоннинг Про Лигадаги вакилидан бу мавсумда кўп нарса кутилаётгани рост. Шунингдек жамоавий ўйинни ҳуш кўрувчи “Дўстлик” учун ҳам яхшигина тажриба орттириш имконияти туғилди. Сабаби, бу гуруҳда Ўзбекистон футболидаги энг совриндор жамоа – “Пахтакор” бор. Қўшимчасига, “Суғдиёна” ҳам янги жамоалар учун мастер класс ўтаб бериши мумкин. “Арал” ва “Дўстлик” учун мактаб вазифасини ўтаб берувчи “Г” гуруҳида “катталар” плей-офф йўлланмаси учун кескин қаршиликка учрамаса керак.

Ҳ гуруҳи

“Шаҳриҳончи”, “Пахтакор 79”, “Хоразм”, “Локомотив БФК”

Чинакам “ҳаёт” гуруҳи! Шуниси аниқ-ки, Плей-оффга 1 лига вакили аниқ чиқади. “Шаҳрихончи” “Пахтакор 79” ва “Локомотив БФК” ўртасида 2 ўрин учун кураш қай даражада кечишини тасаввур қиляпсизми? Боз устига, “Хоразм” ҳозир анча қийин молиявий аҳволда эканлигини ҳисобга олсак, бир эмас икки 1 лига аъзоси кейинги босқичда иштирок этиши мумкин. Бизни Ҳ гуруҳида томошабоб футбол кутиб турибди. Яққол фаворит йўқлиги сабабли сўнгги квартетда интрига қолганларидан кўпроқ эканлиги сезилмоқда.

Яҳёхўжа Улуғхўжаев