Холандга тан берганман!

Англия Премьер-лигаси тўпурарлар пойгасида “Манчестер Сити” ҳужумчиси Эрлинг Холандни таъқиб қилаётган “Борнмут” футболчиси Антуан Семеньо рақобатчисининг зўрлигини тан олди.

- Холанд – биринчи рақамли тўпурар. Унинг ураётган голларини кўриб, “Бунақаси ҳаётда бўлмаса керак”, деган хаёлга боради одам. Бўй-басти, қадди-қоматини айтмайсизми?!

Бўйи баланд, жисмонан бақувват, ҳаракати тезкор ва гол уришни билади. Эрлинг ҳужумчига керакли хусусиятларнинг барчасини ўзида мужассам этган, - деди Антуан Семеньо.

АПЛнинг жорий мавсумида норвегиялик ҳужумчи ўз ҳисобига тўққизта гол ёздириб қўйди. 25 ёшли Холанд Премьер-лиганинг сентябрь ойидаги энг зўр футболчиси, деб топилди. Семеньо эса, чемпионат бошланганидан бери рақиблар дарвозасини олти маротаба ишғол қилган.