"Хоразм" бош мураббийи: "Бу кутилмаган зарба бўлди"

Про лиганинг 4-турида “Хоразм” Фарғонада “Қўқон-1912”га қарши майдонга тушди. Урганчликлар ўз дарвозасидан жавобсиз учта гол ўтказиб юборган ҳолда бу йилги мавсумдаги илк мағлубиятини тан олди. Беллашувдан кейин “Хоразм” бош мураббийи Руслан Аҳмедов мағлубият сабаблари хусусида тўхталди.

- “Қўқон-1912” жамоасини ғалаба билан табриклайман. Улар бунга ҳақли, деб ўйлайман. Тезкор гол ўтказганимиз ўйинимизга таъсир қилди. Кутилмаган ҳолатда узоқдан зарба берилди ва гол. Бунда дарвозабонни айби десам ҳам бўлмайди. Сирпанчиқ эди, олдиндан буни ҳисобга олмагандир, балки. Ҳаракат қилдик. Захирадан ўйинни кучайтирамиз деб иккинчи голни ҳам ўтказиб юбордик. Учинчи гол умуман кутилмаган ҳолатда бўлди. Ҳакамлар учинчи голни ҳисобладилар. Видеотакрорда кўрганимизда иккита ҳимоячимиз бир чизиқда туришганди. Дарвозабон тўпни қўлидан чиқарган тақдирда ҳам ўзимизни ўйинчига урилди. Майли, яна бир бор қўқонликларни ғалаба билан табриклайман. Иккинчи таймда ўйинни бироз кучайтириб, бир-иккита вазиятлар яратдик. Гол уролмадик. Ҳаёт давом этади, бу футбол. Албатта, сафарда 3:0 ҳисобида ютқазиш ачинарли. Кутилмаган натижа. Кейинги ўйинларга тайёргарлик кўрамиз.

- Олдинги ўйинларга нисбатан бугун “Хоразм” анча суст ҳаракат қилди, айниқса, ўйин бошида...

- Футбол шунақа нарсада. Реал ҳолатни оладиган бўлсак, “Қўқон-1912”, “Бухоро” клублари Суперлигага даъвогарлар ҳисобланишади. Балки юқори ўринларда юрганимиз бизга руҳий томондан анча хотиржамлик бағишлагандир. Лекин айтганман: ҳар бир учрашувга “настрой” қилиш керак. Ҳаммасини таҳлил қилиб чиқамиз. Ҳаммаси Худодан. Бу кутилмаган зарба бўлди. Кейинги учрашувларда руҳий томондан янада ишлаймиз.

- Бу йил “Хоразм” таркибини шакллантирди. Бир қатор тажрибали футболчиларни жалб қилди. Бу йил Суперлигага чиқиш вазифаси қўйилганми? Чунки бу йил про лигадан Суперлигага аниқ учта жамоа чиқади.

- Раҳбарият томонидан олдимизга аниқ вазифа қўйилмаган. Ҳаракат қиламиз, юқори ўринларга. Вақт кўрсатади. Жўжани кузда санаймиз.