Хулиан Альварес "Атлетико"дан норози

«Атлетико» ҳужумчиси Хулиан Альварес Мадрид клуби бош мураббийи Диего Симеоне ва жамоа бошқарувидаги асосий шахслардан бири — генерал директор Мигель Анхель Хиль Мариннинг ҳаракатларидан жиддий норози. 

AS нашри ёзганига кўра, футболчи ва унинг атрофидаги одамлар вазиятни ҳал бўлган, деб ҳисобламайди. Аргентина терма жамоаси аъзоси «Атлетико»ни тарк этиб, «Барселона»га ўтиш истагида қатъий қолмоқда, клуб раҳбарияти эса ҳозирча очиқ баёнот бермаётганига қарамасдан.

Манба маълумотича, Альварес бу жараёндан қаттиқ ранжиган. У клубни ўтган йил март ойидаёқ кетиш ниятидан хабардор қилган. Шундан сўнг Хиль Марин ёзма равишда футболчини 150 миллион евро миқдоридаги таклиф келиб тушса, қўйиб юборишга ваъда берган. Қолаверса, айнан «Атлетико» генерал директори ўша пайтда Альваресдан жаҳон чемпионати давомида омма олдида кетиш истагини очиқ эълон қилишни сўрагани таъкидланмоқда.

Хабарларга кўра, ҳужумчи ҳозир клубнинг бу вазиятга муносабатини умуман тушунмаяпти ва раҳбариятнинг қаттиққўл позициясидан жуда норози. Охирги кунларда Хиль Марин у ва унинг агенти билан учрашишдан бош тортган, пайшанба куни эса футболчига унинг трансфери бўйича ҳеч қандай шартга бормаслигини очиқ айтган. Шунга қарамай, Хулиан трансфер ойнаси ёпилгунча «Барселона»га ўтиш масаласини ҳал қилишни истамоқда, бироқ бу йўлда кескин, радикал қадамлар ташлашни режалаштираётгани йўқ.