Хулиан Альваресда иккита вариант қолди

Испаниянинг “Атлетико” клуби ҳужумчиси Хулиан Альварес ўз фаолиятини давом эттириш бўйича иккита вариантга эга бўлиб қолди. Улардан бири  Англиянинг амалдаги чемпиони “Арсенал”дир.

Аввалроқ, ёзда “Атлетико” раҳбарияти “Реал”нинг Альваресни сотиб олиш бўйича таклифини рад этган ва Хулианга қизиқиш билдираётган “Барселона”нинг ҳаракатларига ҳам тўсқинлик қилишда давом этган. “Барселона” футболчининг ўзи учун энг мақбул йўналиш ҳисобланади.

- Гап пулда эмас, гап қадр-қимматда. Футболчини жабрланган томон сифатида кўрсатишмоқда, аммо Хулиан билан боғлиқ вазиятдаги ягона жабрланган томон — биз.

Улар бизга иқтисодий ва ижтимоий зарар етказишди. Уни “Барса”га сотиш эҳтимоли 0 фоиз.

Кўплаб ёлғонлар ва ярим ҳақиқатларга асосланган кампания олиб борилмоқда. Бунинг оқибатини фақат “Атлетико” тўламоқда, - деди “Атлетико” раҳбари.

Шу билан бирга, “Атлетико” Альваресни “Арсенал”га сотиш имкониятини истисно қилмаяпти. Шу сабабли ёзги трансфер ойнасининг қолган кунларида Аргентина терма жамоаси ҳужумчиси танлов қилишига тўғри келади.

Sky Sports маълумотига кўра, 25 ёшли Альварес ё “Атлетико”да қолади, ёки “Арсенал”га ўтади. Бироқ “канонирлар” фақат Хулианнинг ўзи Премьер-лига чемпиони таркибига қўшилиш истагини билдирган тақдирдагина расмий таклиф киритади.