Ямал энди бошқа жойда ўйнайди

“Барселона”ни кетма-кет икки марта Испания чемпионига айлантирган германиялик бош мураббий Ханс-Дитер Флик жамоа етакчиси Ламин Ямални янги позицияда синаб кўришга қарор қилди.

Бу орқали мураббий штаби ПСЖга йўл олган Ферран Торрес ўрнини қопламоқчи. Клуб ҳали унинг ўрнига янги ҳужумчи харид қилгани йўқ. Шу сабабли жамоа аниқ марказий ҳужумчисиз қолиши мумкин ва Флик янги вариантларни синаб кўрмоқда.

Barca Universal маълумотларига кўра, немис мутахассиси машғулотларда Ямални “сохта тўққизлик” позициясида синаб кўрган. Ўнг қанотда Карим Адейеми, чап қанотда Энтони Гордон, “ўнлик” позициясида эса Фермин Лопес ҳаракат қилган.

“Барселона” ҳужум чизиғидаги футболчилар доимий равишда позицияларини алмаштириб турадиган мослашувчан тактик тузилишдан фойдаланиши ҳам мумкин. Бунга ўхшаш услубни кетма-кет икки марта Чемпионлар лигасида ғолиб чиққан Луис Энрике бошчилигидаги ПСЖда кузатиш мумкин. Шунга қарамай, каталонияликлар янги ҳужумчи сотиб олиш ғоясидан ҳали воз кечмаган.