"Ювентус" Бруну Фернандешга қизиқмоқда

«Ювентус» клуби «Манчестер Юнайтед» жамоаси сардори ва марказий яримҳимоячиси Бруну Фернандешга қизиқиш билдирмоқда. Итальян гранди раҳбарияти Лучано Спаллетти қўл остидаги жамоанинг техник салоҳиятини оширишни мақсад қилгани айтилаётир. Бу ҳақда Caught Offside нашри хабар берди.

Манба маълумотига кўра, туринликлар 31 ёшли футболчининг эҳтимолий трансфери масаласини унинг вакиллари билан муҳокама қилган. Таъкидланишича, «Манчестер Юнайтед» Фернандеш учун 50–75 миллион евро атрофида тўлов сўраши мумкин. Бу сумма, футболчининг юқори маоши билан бирга олинганда, трансферни амалга оширишда жиддий тўсиққа айланиши эҳтимол қилинмоқда. Шу билан бирга, португалиялик яримҳимоячи ва манкуниянликлар ўртасида амалдаги шартномани узайтириш бўйича музокаралар ҳам олға силжигани қайд этилган.

Фернандеш «Манчестер Юнайтед» таркибига 2020 йил январь ойида қўшилган. Ўтган мавсумда у барча мусобақалар доирасида 37 та ўйинда майдонга тушиб, 9 та гол урди ва 22 та голли узатма берди. Футболчининг клуб билан амалдаги шартномаси 2027 йил ёзигача мўлжалланган. Transfermarkt портали маълумотларига кўра, Бруну Фернандешнинг бозор қиймати 35 миллион евро атрофида баҳоланмоқда.