“Barsa”ni ustidan kulishdi

Bundesliga grandi “Bavariya”ning faxriy prezidenti Uli Hyoness Germaniya kubogi finalidagi g‘alabadan keyin  jamoa to‘purari Harri Keyn haqida fikr bildirdi.

“Bavariya” hal qiluvchi bahsda angliyalik hujumchining xet-trigi evaziga “Shtutgart”ni 3:0 hisobida mag‘lub etdi va navbatdagi sovringa ega chiqdi.

- Harri Keyn – biz amalga oshirgan eng yaxshi transfer, - dedi Hyoness Das Erste telekanaliga bergan intervyusida.

Jurnalist unga Keynni “Barselona” bilan bog‘layotgan xabarlar haqida eslatganda, Hyoness keskin javob qaytardi:

- “Bavariya” – zo‘r futbolchilarni sotadigan emas, aksincha sotib oladigan klub… Qolaversa, “Barselona”da  bu transferga baribir pul yo‘q, - dedi Uli Hyoness istehzo bilan.

Joriy mavsumda Harri Keyn klub darajasidagi 51 ta o‘yinda 61 ta gol urishga muvaffaq bo‘ldi.