Birinchi iste’fo: Bosh murabbiy ishdan haydaldi

Germaniya Bundesligasida 2026/2027 yilgi mavsumda ilk murabbiy isteʼfosi qayd etildi. Mönxengladbahning «Borussiya» klubi Oygen Polanski endilikda jamoa bosh murabbiyi emasligini maʼlum qildi.

Polanski isteʼfosi «Frayburg» mehmonida 0:5 hisobida magʻlubiyatga uchraganidan bir kun oʻtib eʼlon qilindi. «Borussiya» hozircha Bundesliga jadvalida soʻnggi oʻrinni egallab turibdi – jamoa hali biror ochko qoʻlga kiritmagan.

Oygen Polanski oʻtgan yil noyabrida «Borussiya»ning bosh murabbiyi etib tayinlangan edi. Undan avval u jamoaning vaqtinchalik bosh murabbiyi sifatida ishlagan, undan oldin esa klubning yoshlar va oʻsmirlar jamoalarida murabbiylik qilgan.

Mönxengladbahning «Borussiya» klubi navbatdagi uchrashuvini 19 sentabr kuni oʻz maydonida «Maynts»ga qarshi oʻtkazadi.