Дебютант жамоа икки юлдузни оляпти

Премьер-лиганинг янги иштирокчиси “Ковентри” таркибини янада кучайтириш учун “Ноттингем Форест” ҳужумчиси Тайво Авонийи ва Туркиянинг “Фенербаҳче” клуби форварди Сидики Шерифни сотиб олишга яқин турибди.

2022 йилдан бери “Форест” сафида тўп тепаётган Авонийи “Ковентри”да тиббий кўрикдан ўтиш учун рухсат олди. Клуб 29 ёшли нигериялик футболчи учун 17 миллион фунт стерлинг тўлайди.

Ўтган мавсумда Авонийи Премьер-лигада 17 та ўйинда иштирок этди, аммо фақат уч марта асосий таркибда майдонга тушди ва атиги тўртта гол урди.

Talksport хабарига кўра, Шериф “Ковентри”га 24 миллион евро, яъни 20,5 миллион фунт стерлингга тушади. 19 ёшли гвинеялик футболчи ҳам “Ковентри” сафида тиббий кўрикдан ўтиш учун йўл олмоқда.

Шериф “Фенербаҳче”даги ярим мавсуми давомида Туркия чемпионатида 12 та ўйин ўтказиб, иккита гол урди.