Fayzullaevdan Ronaldu yoki Messini tanlashni so‘rashdi

Jahon futbolining keyingi 15 yili davomida o‘zaro raqobati bilan futbol jamoatchiligida turgan Lionel Messi va Krishtianu Ronaldu Evropa maydonlarini Kilian Mbappe, Erling Xoland, Jud Bellingem kabi yosh iste’dodlarga tashlab chiqib ketdi.

Krishtianu Ronaldu 2023 yilning boshida Saudiya Arabistonining “An-Nasr” jamoasiga ko‘chib o‘tdi. Bu transfer tarixiy ahamiyat kasb etdi. Endi Ronaldu Evropa futbolining mashhur o‘yinchilari va murabbiylariga Osiyo futboliga yo‘l ochgan shaxs sifatida e’tirof etiladi.

Lionel Messi sal boshqacha qaror qabul qildi. Saudiya Arabistonidan taklif qilingan dahshatli maoshlarga e’tibor bermay, kutilmaganda AQShga yo‘l oldi. Argentinalik yulduz “Inter Mayami” safiga borib qo‘shildi.

Bu ikki yulduz garchi jahon futboli cho‘qqisidan sekin-asta pastga tushayotgan bo‘lsa-da, hamon ulardan qay biri zo‘rligi haqidagi savollar tingani yo‘q.

TsSKAda o‘ynayotgan Abbosbek Fayzullaev ham rossiyalik jurnalistlar tomonidan aynan mana shu mavzuda savol-javob qilishiga to‘g‘ri keldi.

Savollar qisqa, javoblar lo‘nda bo‘ldi.

- Messimi yoki Ronaldu?

- Albatta, Messi.

- Nega?

- O‘yin uslubiga ko‘ra, - dedi Abbos Fayzullaev.

Ta’kidlash joizki, Abbos intervyularida bir necha marotaba bolaligidan “Barselona”ga muxlislik qilishi, Lionel Messining harakatlarini tomosha qilib, uning o‘yin uslubidan o‘ziga kerakli jihatlarni o‘rganishi va kelajakda “Kamp Nou”da to‘p tepish orzusi borligini ta’kidlagan edi.

20 yoshli futbolchimiz ingliz tilini yaxshi bilishiga qaramay, ayni paytda ispan tilini o‘zlashtiriga harakat qilayotgani bejiz emas, albatta.

Krishtianu Ronaldu va Lionel Messi faoliyati davomida katta yutuqlarni qo‘lga kiritgan. Yagona farq portugaliyalik o‘yinchida jahon chempionatining oltin medali yo‘q. Har ikkisi klublar miqyosida barcha nufuzli turnirda bir necha marotabadan g‘olib chiqqan, “Oltin to‘p”ni ham ko‘p marotaba boshi uzra ko‘targan. Terma jamoasi safida qit’a chempionatlarida muvaffaqiyat qozongan.

Endi bu yulduzlari o‘zlari tanlagan yangi qit’alar – Osiyo va Amerikada futbol rivojiga katta hissa qo‘shish bilan band.