Husanovning raqobatchisi qancha muddatga safdan chiqdi?

Xabaringiz bor, Angliya Premier-ligasi 20-turning markaziy bahsida "Manchester Siti" "Chelsi" bilan 1:1 hisobidagi durangga imzo chekdi. "Shaharliklar" so‘nggi daqiqalarda g‘alabani qo‘ldan chiqarganidan tashqari, ikki markaziy himoyachisi ham ushbu bellashuvda jarohat olib safdan chiqdi. 
 
"Manchester Siti" klubining rasmiy bayonotiga ko‘ra, Yoshko Gvardiol o‘ng oyog‘ining boldir suyagini sindirib olgan. Shu bois, xorvatiyalik himoyachi 3-6 oy manchesterliklarga yordam bera olmasligi mumkin. 

 
Ma’lumot o‘rnida, kechagi to‘qnashuvda Gvardiolning o‘rniga 50-daqiqada O‘zbekiston milliy terma jamoamiz himoyachisi Abduqodir Husanov zahiradan o‘yinga qo‘shilgan edi. Yoshkoning jarohati Husanov uchun asosiy tarkibga qaytish uchun yaxshi imkoniyat deb aytilmoqda. 

 
Yoshko Gvardiol va Ruben Diashning jarohati sabab, klub rahbarlari ijaradagi Maks Alleynni ijaradan muddatidan oldin qaytarib oldi. Shuningdek, Fabrizio Romanoning ma’lum qilishicha, jamoa qishki transferlar oynasida Mark Gexi uchun kurashishni rejalashtirmoqda.