Liverpool» Van Deykka o‘rinbosar qidirmoqda

«Liverpool» jamoasi kapitani Virjil van Deyk mavsum yakunida klubni tark etib, erkin agent sifatida «Milan» safiga o‘tishi kutilmoqda. Bu haqida italyalik jurnalist Karlo Pellegatti xabar berdi. 35 yoshli gollandiyalik markaziy himoyachi «Enfild»da to‘qqiz yil o‘ynab, «Sautgempton»dan kelgan paytida dunyodagi eng qimmat himoyachiga aylangan edi. Hozirda van Deykning «Liverpool» bilan amaldagi shartnomasi 2027 yil yozigacha mo‘ljallangan.

«Milan» egasi Jerri Kardinale bu masalada o‘z pozitsiyasini aniq bildirgani aytilmoqda: «Yoki biz uni hozir pul evaziga olamiz, yoki kelasi yili bepul qo‘lga kiritamiz. Van Deyk baribir erta yoki kech «Milan»ga keladi», — deya Pellegattining so‘zlarini keltiradi manbalar.

CaughtOffside ma’lumotlariga ko‘ra, «Liverpool» van Deykning o‘rniga «Tottenxem» kapitani Mikki van de Venni asosiy nomzod sifatida ko‘rib chiqmoqda. 25 yoshli himoyachi Niderlandiya terma jamoasida ham van Deyk bilan birga o‘ynaydi va chap qanot himoyachisi sifatida ham harakat qila oladi. Bu esa «qizillar» uchun muammoli deb hisoblangan pozitsiyani yopish imkonini beradi. Van de Vennning «Tottenxem» bilan shartnomasi 2031 yilgacha amal qiladi, uning transfer qiymati taxminan 50 million yevro atrofida baholanmoqda. Gollandiyalik himoyachiga «Manchester Yunayted» klubi ham jiddiy qiziqish bildirmoqda.