“Australian open-2017”: Истомин навбатдаги сенсацияга тайёрми?
Бугун бутун теннис мухлисларининг эътибори бу йилги Австралия очиқ чемпионати қаҳрамони Денис Истомин ва испаниялик теннисчи Пабло Карреньо-Буста ўртасидаги учинчи давра ўйинига қаратилади.
Ўзбекистонлик ракетка устаси иккинчи босқичда Австралия очиқ чемпионатининг олти карра ғолиби сербиялик Новак Жоковични қарийб беш соат давом этган учрашувда мағлуб этгач, ҳамюртимизнинг иштирокига миллионлаб мухлислар қизиқиб қолди.
Хўш бу гал Денис Истоминнинг имкониятлари қандай?
Денис Истомин айни пайтда жаҳон рейтингида 117-поғонани эгаллаб турибди. Унинг рақиби Пабло Карреньо-Буста эса 31-қаторда қайд этилган. Ҳозир испан теннисчи фаолиятида кўтарилиш кузатилмоқда. Бу спортчи ўтган йили Профессионал теннисчилар уюшмаси мусобақалари тақвимидаги Москвадаги "Кремль Кубоги" ва АҚШдаги "Уинстон-Сейлем" турнирларида бош совринга эга чиққан. Денис Истомин эса АТР таснидаги ягона совринини 2015 йили Англияда қўлга киритган.
Бунгача Денис Истомин ва Пабло Карреньо-Буста икки маротаба куч синашган. Ўтган йили Испаниядаги "Barcelona Open BancSabadell" ва Марокашдаги "Grand Prix Hassan II - Marrakech" турнирларида кескин ва муросасиз баҳсларда испан теннисчисининг қўли баланд келган.
Бироқ, бугунги ўйин тақдири фақатгина кортда ҳал бўлади. Денис Истомин Новак Жоковични мағлуб этиш орқали статистикалардаги устунлик кортда ёрдам бермаслигини ва енгилмайдиган теннисчи йўқлигини ҳаммага исботлаб берди.
Бугунги муҳим беллашувда ўзбекистонлик теннисчига ғалаба ва омад тилаймиз.
Комментарии