Акбар Тўраев: Кузда ОЧЛ йўлланмасини ҳал қилишга ҳаракат қиламиз
Бугун Тошкент вилоятининг “Олмалиқ” клуби янги мавсум олдидан таркибга қўшиб олинган футболчиларнинг таништирув маросимини ўтказди. Тадбир "Миран" меҳмонхонасида бўлиб ўтди.
Ушбу таништириш маросимидан сўнг SPORTS.uz мухбири олмалиқликларнинг янги аъзоси Акбар Тўраев билан сухбатлашди.
Бир неча йил “Бунёдкор” сафида майдонга тушгансиз. Ҳозир эса “Олмалиқ”дасиз. Янги жамоангиз ҳақидаги дастлабки фикрларингиз?
- Мен 8-9 йил “Бунёдкор” шарафини ҳимоя қилдим. Бунинг учун жамоадаги барчадан миннатдорман. Шунча йил мобайнида барча билан яқин бўлиб кетганмиз.
Бу мавсум “Олмалиқ” ўз олдига катта мақсадлар қўйган. Шунинг учун мен айнан “Олмалиқ” вариантини танладим. Мураббийимиз айтиб ўтганидек, ОЧЛга бериладиган ўринлар учун курашамиз. Бунинг учун кузга келиб бу мақсадимизни амалга оширамиз деб ўйлайман.
Жамоада яхши футболчилар жамланган. Мен бу клубга қўшилишимдан олдин жамоа раҳбарлари, оила аъзоларим билан гаплашган ҳолда қарор қабул қилдим. Клуб мутасаддилари катта ишонч билдиришди. Энди “Олмалиқ”қа қўлимдан келганича ёрдам беришга ҳаракат қиламан.
Сизга яна бирор бир клубдан таклифлар бўлдими?
- Албатта, 3-4 клубдан чорловлар бўлди. Улар орасида жиддийлари ҳам бор эди. Лекин “Олмалиқ”нинг мақсади ОЧЛ бўлгани учун шу жамоани танладим. Қолаверса, ўзим ҳам “Бунёдкор” билан бу мусобақада иштирок этганман.
Янги мавсумдан сиз нималарни кутмоқдасиз?
- Олий лига-2017 қизиқ бўлиши аниқ. Чунки кўплаб жамоалар жиддий тарзда кучаймоқда. Ўйлаган барча орзуларимизга етишимизга умид қиламан. Юқорида айтиб ўтганимдек, халқаро мусобақаларда иштирок этишимизни кутмоқдаман. Янги мавсумда зафарлар ёр бўлишини тилаб қоламан.
Бекзод Исаев суҳбатлашди
Фикрлар