Энг зўр боксчига бериладиган ва ҳозир Ҳасанбой Дўсматов эгаллаб турган Вэл Баркер кубоги ҳақида нималар биламиз?
Вэл Баркер кубоги (инг. Val Barker Trophy) 1936 йилдан буён Олимпия ўйинларидаги техникаси энг кучли боксчига бериб келинаётган нуфузли совриндир.
Ушбу кубок 1920 йилда Халқаро ҳаваскор боксчилар ассоциациясининг (AIBA) биринчи фахрий котиби бўлган инглиз боксчиси Вэл Баркер шарафига таъсис этилган.
Вэл Баркер кубоги AIBA мулки ҳисобланади ва Олимпия ўйинларида қандай ўрин эгаллаганидан қатъий назар жанг олиб бориш техникаси энг мукаммал, деб топилган боксчига берилади. Бу номга сазовор бўлган боксчига Кубок нусхаси ва AIBA дипломи тақдим этилади. Кубокнинг ўзи мусобақалар якунлангач, эртасига махсус ташкил этилган маросимда AIBA аъзолари ва таклиф қилинган нуфузли меҳмонлар гувоҳлигида топширилади. Ушбу маросимга ғолибликка даъвогар бўлган барча боксчилар ҳам таклиф этилади.
Кубокнинг асосидаги лавҳга соврин соҳибининг исми, вазн тоифаси, мамлакати ва Олимпия ўйинлари мезбони номи ва мусобақа ўтказилган йил ёзилади.
Кубокни олган боксчи совринни кейинги Олимпия ўйинларигача сақлаш учун ўз миллий федерацияси вакилига топширади. Миллий федерация AIBAга Кубокни сақлаш учун ёзма кафолат беради ва халқаро федерацияси ҳисобига совринни сақланишини кафолатловчи суғурта пулини ўтказиб беради.
Кейинги Олимпия ўйинларининг бокс мусобақалари бошланишидан камида етти кун олдин миллий федерацияси Кубокни AIBA ижроия қўмитаси аъзоларига қайтариши шарт. Соврин соҳиби бўлган боксчи кейинги Олимпиадага фахрий меҳмон сифатида таклиф этилади ва Кубокни янги боксчига топшириш маросимида қатнашади.
Агар кетма-кет учта Олимпиада давомида ушбу Кубокни бир миллий федерация вакиллари қўлга киритса, соврин ўша миллий федерациянинг мулкига айланади.
Бироқ ҳали Олимпия ўйинлари тарихида ҳеч бир мамлакат вакилларига кетмаган уч марта Вэл Баркер кубогига эга чиқиш насиб этмаган.
Вэл Баркер кубогининг амалдаги соҳиби ўзбекистонлик чарм қўлқоп устаси Ҳасанбой Дўсматов ҳисобланади. Ҳамюртимиз 2016 йили Рио-де-Жанейрода ўтган Олимпия ўйинларида олтин медални қўлга кириди ва мусобақа да иштирок этган 250 нафар боксчи орасида техникаси энг зўр боксчи деб топилди.
Ҳасанбой Дўсматовнинг Олимпия ўйинларидаги суратларини томоша қилинг:
Фикрлар