Ҳам “Барселона”, ҳам “ПСЖ”да ўйнаган 6 та энг яхши футболчи
Бугун тунда ЕЧЛ 1/8 финал доирасида иккита жавоб баҳси бўлиб ўтади. Жумладан, “Барселона” ўз майдонида “ПСЖ”ни қабул қилади. Бўлажак учрашув олдидан эса биз ушбу жамоаларда ўйнаган энг яхши футболчилар билан сизларни таништирамиз.
Мавзуга оид: “Барселона” дарвозасини ЕЧЛда “илма-тешик” қилган жамоалар
“Барселона” – “ПСЖ ” учрашувига оид 12 та факт
Людовик Жюли
“Барселона”: 2004–2007(124 ўйин, 26 гол)
“ПСЖ”: 2008 – 2011(125 ўйин, 19 гол)
Фаолиятининг “гуллаган” даврини “Барселона”да ўтказган франциялик футболчи каталон клубида икки бор Ла лигада ғолиб чиққан бўлса, яна бир бор ЕЧЛда ғалаба қозонади. “ПСЖ”га эса қўпол қилиб айтганда “ёши ўтган” маҳал келган бўлишига қарамай ўзининг ёрқин ўйинлари билан мухлислар меҳрини қозона олади.
Тиаго Мотта
“Барселона”: 1999–2007(139 ўйин, 9 гол)
“ПСЖ”: 2012–ҳозиргача(186 ўйин, 10 гол)
Мотта “Барселона”да 8 йил тўп суради ва жамоадаги кучли рақобат туфайли жамоасини ўзгартиради. 8 йилда 140 га яқин ўйин, бу жуда ҳам камдир. 2012 йилнинг январида “ПСЖ” “Интер”дан Моттани ҳарид қилади. Ушбу трансфер парижликлар учун 11,5 млн еврога тушади. Аммо тан олиш керак, Мотта ҳозирда “ПСЖ”да асосий таркибдаги ўрнини йўқотиб бўлди.
Люка Динь
“Барселона”: 2016–ҳозиргача
“ПСЖ”: 2013–2016(43 ўйин)
Люка Динь “ПСЖ”нинг асосий футболчиси бўлган эмас. 2015 йилги мавсумни “Рома”да ўтказган ҳимоячини “Барселона” 16 млн евро эвазига сотиб олди. Динь “блаугранаслар” сафида етарлича ўйин амалиётига эга бўлаётган бўлсада, асосий ўйинларда Луис Энрике кўпроқ Хорди Альбага имкон бермоқда.
Максвелл
“Барселона”: 2009–2012(89 ўйин, 2 гол)
“ПСЖ”: 2012–ҳозиргача(185 ўйин, 14 гол)
Максвеллни Златан Ибрагимовичнинг “яқин дўсти” дейишимиз мумкин. Зеро, бу икковлон биргаликда “Аякс”, “Интер”, “Барселона” ва “ПСЖ”да тўп суришга улгурган. Аммо бразилиялик ҳимоячи шведдан фарқли ўлароқ, ўтган ёзда жамоасини алмаштириш истагини билдиргани йўқ.
Роналдиньо
“Барселона”: 2003–2008(207 ўйин, 94 гол)
“ПСЖ”: 2001–2003(86 ўйин, 25 гол)
Роналдиньо Европадаги илк сабоқларини айнан Францияда, аниқроғи “ПСЖ”да олади. Париждаги 3 йил давомида еврофутболга мослашган Роналдиньони 2003 йил “Барселона” 32,5 млн евро эвазига сотиб олади. Ушбу сумма бундан 14 йил муқаддам анча катта қийматга эга бўлганлигини қайд этиш жоиз. Каталониядаги сўнгги икки йилни “бедор” ўтказган бразилиялик футболчи кейинчалик “Милан”дан нажот излаган эди.
Златан Ибрагимович
“Барселона”: 2009–2010(46 ўйин, 22 гол)
“ПСЖ”: 2012 – 2016(180 ўйин, 156 гол)
“Интер”дан катта умидлар билан ҳарид қилинган Ибрагимович Каталонияда бир йил ўйнади холос. Бунинг ўзига яраша сабаблари бор эди, албатта. Аввало, бош мураббий – Хосеп Гвардиоланинг “тилини топа олмаган” Златан ҳам нажотни “Милан”дан излаган эди. 2012 йил “ПСЖ”га ўтган швециялик форвард Париждаги 4 йил ичида афсонага айлана олди дейишимиз мумкин.
Шаҳзод Холбоев тайёрлади
Фикрлар