Агуэро "Сити"дан кетмайди

Англиянинг "Манчестер Сити" клуби форварди Серхио Агуэро жамоасини ўзгартириш ниятида эмас.

“Менинг амалдаги шартномам 2020 йилга қадар имзоланган ва мен ушбу келишув сўнггига қадар шу ерда ўйнамоқчиман. Мавсумнинг қолган қисмини янада яхшироқ ўтказишга ҳаракат қиламан. Ундан сўнг эса воқеалар ривожини кузатамиз.

Шу ерда қолишни истайман ва жамоамни ўзгартирмоқчи эмасман. Мен “Манчестер Сити”да бахтлиман, бироқ, сўнгги қарорни барибир раҳбарият қабул қилади”, - дейди аргентиналик футболчи.

Маълумот учун, Агуэро жорий мавсум АПЛнинг жами 17та учрашувида иштирок этиб, ўз ҳисобига 13та гол ҳамда 4та голли узатма ёздириб қўйишга эришган.