Беллингем: Ҳозирги муваффақиятларимда бу инсоннинг ўрни катта...

Мадриднинг “Реал” клуби футболчиси Жуд Беллингем ҳозирги муваффақиятларида бош мураббий Карло Анчелоттининг ҳиссасини эътироф этди.

Гап шундаки, италиялик мутахассис англиялик футболчи Дортмунднинг "Боруссия"сида ўйнаганидан кўра кўпроқ ҳужумкор ролда ўзини яхшироқ кўрсатишига ишонди. Бу эса ўзини тўлиқ оқлади: 20 ёшли футболчи ўзини янгича кўринишда намоён қила олди ва ўз ўйини билан бутун футбол оламини ҳайратда қолдирди.

“Майдондаги янги позициям мен учун идеал, у кўпроқ эркинлик беради. Барча эътирофлар мураббийга тегишли, чунки Дортмундда узоқ вақт давомида орқа позицияларда ўйнаган футболчи ҳақида гапирганда, бундай қарорга келиб, таваккал қилиш осон эмас”, - деди Беллингем Madrid Zone нашрига берган интервьюсида.

Жуд Беллингем жорий мавсум “Реал” сафида жами 37 та ўйинда майдонга тушди ва ўз ҳисобига 22 та гол ҳамда 9 та голли узатма ёздириб қўйди. У “қироллик клуби” таркибига 2023 йилнинг ёзида “Боруссия Д”дан 133 млн евро эвазига кўчиб ўтган ва 6 йиллик шартнома имзолаган.