Кеча Қатардан келиб, бугун майдонга тушган "Навбаҳор" футболчиси

Суперлига 6-туридан ўрин олган "Навбаҳор" - "Локомотив" баҳси бўлиб ўтди. Голларга бой ўтган учрашувда майдон эгалари 4:0 ҳисобда ғалаба қозонди.

Голларга Жамшид Болтабоев, Одилжон Ҳамробеков, Йован Жокич ҳамда Сияваш Ҳақназари муаллифлик қилди. "Темирйўлчилр" футболчиси Дилшодбек Комилов 75-дақиқада қизил карточка олиб майдонни эрта тарк этди.

Ўйиндаги энг қизиқарли эпизодлардан бири беллашувнинг 78-дақиқасида рўй берди. Салкам бир ой Қатар яшил майдонларида Олимпия терма жамоамиз сафида тўп тепиб, "Париж-2024" йўлланмаси учун ўз ҳиссасини қўшган Русланбек Жиянов 78-дақиқада Асад Собиржонов ўрнига майдонга тушди. Эътиборлиси, у кеча узоқ сафардан қайтган. Шунингдек, "лочинлар" устози Самвел Бабаяннинг айтишича, унинг кеча бироз тоби бўлмаган. Бироқ унинг ўзи бугунги "Локомотив"га қарши ўйинда иштирок этишни хоҳлаган.