Хитойдаги “миллионер” футболчилар. Топ-7

Хитой чемпионати жамоалари футболчиларни катта маблағлар эвазига сотиб олишмоқда ва бу борадаги барча рекордларни бирин-кетин янгилаб боришмоқда. Албатта, юлдуз футболчиларнинг савияси нисбатан паст бўлган Хитойга келиши учун чинликлар уларга мисли кўрилмаган даражада катта маош таклиф этишмоқда ва айни шу сабаб, Оскар, Тевес, Витцель сингари футболчилар Еврофутболдан Хитой Супер лигасини афзал билишмоқда. Қуйидаги мақоламиз орқали эса айнан шундай йўл тутиб, “тинчгина” Хитой жамоаларида катта маош эвазига тўп сураётган футболчилар билан танишасиз.

7. Рамирес(”Жиангсу Сунин”) – йилига 13 млн евро

Бундан роппа-роса 1 йил илгари “Челси” бразилиялик ярим ҳимоячини “Жиангсу Сунин”га 25 млн фунт эвазига сотиб юборган эди. Хитойликлар билан 4 йиллик битим тузган Рамирес йилига 13 млн евро маош олиб келмоқда. Якунланган мавсумда 29 ёшли футболчи жамоа сафида 26 ўйинда майдонга тушди ва 4 та тўп киритиб шерикларини бир бор голли узатма билан таъминлади.

6. Грациано Пелле(“Шандонг Луненг”) – 16 млн евро

Ёзги трансферлар вақтида “Саутгемптон”дан 13 млн фунтга таклиф этилган Пелле “Шандонг Луненг” билан 2,5 йиллик шартнома имзолаган. Ушбу шартнома бандларига кўра эса италиялик форвард йилига 16 млн евро миқдорида маош олади. 31 ёшли футболчи Хитойга давралар оралиғида борган бўлсада, 13 та ўйинда иштирок этиб, 5 та гол урди ва 2 та голли узатмани амалга оширишга эришди.

5.  Аксель Витсель(“Тяньцзинь Цюаньцзянь”) – 17,72 млн евро

Янг йилнинг илк кунларида Витсель катта маошни устун билиб, “Ювентус”га рад жавобини берди ва Хитойга йўл олди. Ўз навбатида “Тяньцзинь Цюаньцзянь” бельгиялик футболчи учун питерликларга 20 млн евро тўлашди. 28 ёшли футболчини эса йилига салкам 18 млн евро тўлашни ваъда қилиб кўндиришди. Янги мавсумда эса у бундай катта маошга қанчалик муносиб эканлигини билиб оламиз.

4.  Халк(“Шанхай СИПГ) – 19,25 млн евро

Ахмедовнинг янги жамоадошларидан бири бўлган Халк “Шанхай СИПГ”га ёзда бориб қўшилган эди. Бразилиялик футболчи учун Хитой клуби “Зенит” ҳисоб рақамига 55,8 млн евро ўтказиб берган эди. Давралар оралиғида қўшилган Халк мавсумнинг қолган қисмида 7 та ўйин ўтказиб 5 та гол киритишга муваффақ бўлди. 30 ёшли ҳужумчининг ушбу хизматлари учун эса “Шанхай СИПГ” йилига салкам 20 млн евро тўламоқда.

3. Оскар(“Шанхай СИПГ”) – 24,06 млн евро

Оскар эса Ахмедовдан бироз олдин жамоа билан шартнома имзолаганидан хабарингиз бор. “Шанхай СИПГ” Оскар учун “Челси”га 60 млн еврони “қуртдек санаб” берди. Етмаганига эса футболчига 24 млн евро маош тайинлади. Бразилиялик футболчи бу пуллар бекор сарфга сарф этилмаганини исботлашга ҳаракат қилса, ажаб эмас.

2. Эсекьел Лавесси(“Хебей Чайна) – 24,06 млн евро

Ўтган йили “Хебей Чайна” жамоаси Лавесси учун “ПСЖ”га 10 млн ерво берган эди. Футболчининг ўзини эса юқоридаги сумма эвазига кўндирган Хитой клуби аргентиналик футболчига 10-рақамли либосни тақдим этди. Лавесси эса мавсум давомида бор йўғи 10 та ўйин ўтказди холос.

1. Карлос Тевес(“Шанхай Шеньхуа”) – 37 млн евро

“Шанхай Шеньхуа” Тевесни жаҳондаги энг кўп маош олувчи футболчига айлантирганидан хабарингиз бор. Аргентиналик форвард бу пулларга муносибми ёки бунинг акси, буни янги мавсумда билиб оламиз. Бизга шуниси аниқки, Карлитос кунига 100 минг евродан ҳам кўп пул топади.

Шаҳзод Холбоев тайёрлади