"Арсенал"да жароҳатланганлар сони кескин ошди — Артета сабабини тушунтирди

"Арсенал" футболчилари ўтган мавсум бошидан буён жами 95 та жароҳат олган — бу кўрсаткич бўйича фақат "Брайтон" лондонликлардан юқори. Жорий мавсумнинг ўзидаёқ жамоада 28 та жароҳат қайд этилган, бу ҳам Премьер-лигадаги энг юқори кўрсаткичлардан бири.

Лондонликлар бош мураббийи Микель Артетадан футболчиларни ортиқча машқ билан чарчатаяптими, деган савол берилди.

Артета бу фикрни рад этди:

"Йўқ, чунки бизда тўлиқ машғулот ўтказишга вақт йўқ. Бугун 20 дақиқа ишладик, шунинг учун бу футболчиларнинг ортиқча чарчаши билан боғлиқ эмас. Лекин аниқки, таркибда кўп футболчи йўқлигида, қолганларга юклама ошади ва бу оқибатларга олиб келади — жуда хавфли бир айланма пайдо бўлади.

Жароҳатлар турини фарқлаш керак. Айримлари узоқ муддатли, бошқалари тўсатдан рўй берган. Биз доимий равишда таҳлил қилиб боряпмиз. Биз кўп ўйинларни жароҳатга учраганлар сони баланд бўлган шароитда ўтказдик, бу эса кучли зўриқишга олиб келади — натижада янги жароҳат пайдо бўлади", — дея таъриф бериб ўтди испаниялик мураббий.