“Арсенал”да жиддий йўқотиш

Англия Премьер-лигасида етакчилик қилаётган “Арсенал” сардори Мартин Эдегор бир неча ҳафта давомида жамоадошларига майдонда ёрдам беролмайдиган бўлди.

BBC журналистларининг аниқлашича, норвегиялик плеймейкернинг жароҳати кутилганидан жиддийроқ бўлиб чиққан ва у камида тўққизта учрашувни ўтказиб юборишига тўғри келади.

Экспертларнинг таъкидлашича, Эдегор Англия Премьер-лигасида “Фулхэм”, “”Кристал Пэлас”, “Бёрнли” ва “Сандерленд”га қарши ўйинларни ўтказиб юборишга мажбур.

Бундан ташқари, Европа Чемпионлар лигасида Мадриднинг “Атлетико” ва Праганинг “Славия” жамоалари билан бўладиган тўқнашувларда ҳам “канонирлар” сафида бўлмайди.

Лига кубогидаги “Брайтон” билан бўладиган баҳс Мартин Эдегорсиз ўтади.

Мартин Эдегор “Реал” асосий таркибига киритилмаганидан кейин 2021 йилнинг ёзида “Арсенал”га кўчиб ўтган эди. Маҳоратли ярим ҳимоячи лондонликлар бош мураббийи Микель Артета қўл остида жамоанинг асосий ўйинчисига айланди.