Доннаруммани ПСЖдан “йўқотмоқчи” бўлаётган раҳбар кимлиги маълум бўлди

Европа Чемпионлар лигасининг амалдаги ғолиби “Пари Сен-Жермен” янги мавсум олдидан “Лилль” дарвозабони Люк Шевальени трансфер қилди.

Бу ўз навбатида асосий дарвозабон Жанлуижи Доннарумманинг келажагига таъсир қилади. Италиялик голгипер клубдан кетишга мажбур бўлади.

Гап шундаки, ПСЖ спорт директори Луиш Кампуш раҳбарият вакиллари билан муҳокамада дарвозабонлар ротациясига қарши чиқди ва Доннарумманинг клубдан кетишини талаб қиляпти.

L'Equipe нашри журналисти Лоик Танзининг таъкидлашича, Кампуг Шевальега жамоада биринчи рақамли посбон бўлишини кафолатлаган. Бундан ташқари, бош мураббий Луис Энрике ва Шевалье ўртасидаги суҳбатда франциялик голкипер энг юқори даражада ўйнашга тайёр экани муҳокама қилинган.

Доннарумманинг агентлари ҳам италиялик футболчининг кетиши устида иш бошлаган. Айни пайтда маҳоратли голкиперга Англиянинг бир неча гранд клублари жиддий қизиқиш билдиряпти.