Гвардиола келаси мавсумни бошқа лигада бошлаши мумкин

Келаси мавсум олдидан “Малан” жамоасининг бош мураббийи Хосеп Гвардиола бўлиши мумкин. Бу ҳақда бирданига иккита нуфузли манба – Corriere della Sera ҳамда La Gazzetta dello Sport нашрлари хабар тарқатди.

Маълумотларга қараганда, миланликлар клуб спорт директорлигига Фабио Паратичини таклиф этмоқчи. Бу мутахассис “Манчестер Сити” бош мураббийи Хосеп Гвардиола билан жуда яхши алоқага эга ва унинг танловига таъсир ўтказа олади.

Айни пайтда “Милан” раҳбарияти Фабио Паратичи билан келаси мавсумдан бошлаб ҳамкорлик қилиш бўйича оғзаки келишувга эришгани айтилмоқда.

Италия клуби фақатгина Гвардиолага қараб қолган эмас. Улар ҳозир Франция чемпионатида “Марсель”ни бошқараётган асли италиялик мутахассис Роберто Де Дзербини ҳам нишонда ушлаб турибди.

“Милан” кейинги пайтда кучли бош мураббийга эҳтиёж сезмоқда. Ўтган ёз клубни Стефано Пиоли тарк этган эди. Ўрнига португалиялик Паулу Фонсека таклиф этилди. Бироқ у ишни уддалай олмади ва 2024 йилнинг 30 декабрь куни ўрнини ҳамюрти Сержиу Консейсауга бўшатиб берди. Консейсау ҳам жамоада узоқ ушланиб қолмайдиган бўляпти.