«Ҳаммаси жонга тегди...» Микаэл Лаудруп нега «йўқ» бўлиб қолди?

«Барселона» ва Дания терма жамоаси афсонаси ўзини мураббийликда синаб кўрганидан хабарингиз бор. 2009 йилда Москванинг «Спартак» жамоасида иш бошлаган мутахассиснинг фаолияти қандай кўриниш олди? «Барселона» ва «Реал»да бирдек юқори савияда ҳаракат қилган футболчи ҳозир қаерда? Бугун шу ҳақида батафсил фикр юритамиз.

Қаҳрамонимизнинг фаолиятини бемалол икки қисмга ажратиш мумкин. Микаэл футболчи ва мураббий сифатида икки хил шахс бўлиб гавдаланади. Унинг қай даражадаги устоз экани ҳақида турлича қарашлар мавжуд. Шундай бўлса-да, унинг футболчилик даври ёрқин ғалабаларга бой ўтгани аниқ. Ваҳоланки, Лаудруп бошқарувидаги «Хетафе» УЕФА кубогида чорак финалга қадар етиб келган ва сал бўлмаса, «Бавария»ни мусобақадан чиқариб юбориши мумкин эди. 2007/08 йилда мураббийлик соҳасига кириб келган мутахассис «Бавария» билан меҳмонда 1:1 натижасини қайд этади. Жавоб учрашувининг 80-дақиқасига қадар испан клуби 3:1 натижаси билан олдинда эди, аммо Лука Тони киритган иккита гол якунда «Хетафе»нинг мусобақани тарк этишига сабабчи бўлади.

Микаэлнинг фаолиятида чинакам бурилиш ясаган воқеа сифатида «Суонси» билан тузилган шартномани кўрсатишимиз мумкин. У клубнинг 102 йиллик тарихини янгилади. Камтарин клубни Англиянинг қуйи дивизионидан АПЛга қадар олиб чиқди. Англия лига кубогида зафар қучди ва жамоасини Европа Лигасига олиб чиқди. «Валенсия», «Кубан» ва «Санкт-Галлен» билан бир гуруҳда жой олганига қарамай, ортиқча муаммосиз кейинги босқичга йўл олди. Ички биринчиликда эса, клуб тарихидаги энг яхши кўрсаткич - 9-ўринни эгаллади.

Ажойиб мавсумларга қарамай, Уэльс клуби раҳбарлари даниялик мутахассисни истеъфога чиқаришга қарор қилди. Бунга, мураббийнинг ОАВ орқали кескин чиқишлар қилгани сабаб бўлгани тахмин қилинган эди. Даниялик афсона инглиз журналистларининг барча саволларига сукут сақлади ва жамоа шаънига бир сўз айтмай постни топширди.

2014 йилда юлдузлар учун улкан пуллар таклиф қилишни хуш кўрувчи Қатарга йўл олди. 2022 йилда ЖЧни ўзида ўтказувчи юрт «Барселона»нинг собиқ футболчиларини мамлакатга чорлашни яхши кўради. Тўғри, Микаэл Хави сингари улкан машҳурликка эришгани йўқ, аммо катта воқеаларда иштирок этди. У бошқарувидаги «Лаҳвия» (ҳозирги «Ал-Дуҳайл») Қатар кубоги ва чемпионати олтин медалига эга чиқди. Шунингдек, ОЧЛда чорак финалга қадар етиб келди. Ўша йилнинг охирида уни Қатарда йил мураббийи, деб эътироф этишди. 2015 йилда мураббий билан янги шартнома имзолаш учун музокаралар бошланди. Қаҳрамонимиз талаб қилган сумма ҳатто, қатарликларга ҳам оғирлик қилди чоғи, келишув амалга ошгани йўқ. Унинг клубни тарк этиши Осиё клуби учун оғирлик қилди. Жамоа ОЧЛ чорак финалида енгилди. Чемпионликни ҳимоя қила олмади.

Бу пайтга келиб, Лаудрупда терма жамоани бошқариш имконияти пайдо бўлди. У терма жамоа бошқарувида 15 йил давомида фаолият олиб борган Мортен Ольсенни алмаштирди. 2 йил фаолият олиб боргач, қаҳрамонимизга яна Қатардан таклиф келиб тушди. Шахсий шартномада кўрсатилган 6 хонали рақамлар сабабли, Микаэл терма жамоа постини топшириб, қитъамизга қайтиб келди. Афсуски, «Ал-Райян»да у «Леҳвия»да кўрсатган натижасини такрорлай олмади. Икки йил давомида икки бор чемпионат бронза медалларига эга чиқди холос. ОЧЛда эса гуруҳ босқичидан уёғига ўта олмади. 2018 йилга келиб, клуб у билан ўртадаги шартномани узайтиришдан бош тортди.

Ўша йилнинг охирида Испаниянинг АS нашри каттагина мақола эълон қилди. Унда даниялик мураббийга Мадриднинг «Реал» клуби таклиф билан чиққани ёзилган эди. «қироллик клуби» Лаудрупдан Хулиан Лопетегининг ўрнини эгаллашини илтимос қилган экан. Мутахассис «Реал»да вазият мураккаблиги сабабли шартномани рад этади. Бундан ташқари, даниялик афсона бу пайтга келиб, футболга бўлган қизиқиш сўнганини ҳис қилади. Аввалги мотивацияси йўқ эканлигини пайқагач, бошқа футболга қайтмасликка қарор қилади.

"Бир йил аввал, ўз мураббийлик фаолиятимдаги энг сўнгги мавсумлардан бирини ўтказаётганим ҳақида фикр билдирган эдим. "Ал-Райян" менинг фаолиятимдаги энг охирги клуб бўлса, ажаб эмас. Ёзда 54 ёшга қадам қўйдим. 1998 йилда футболчилик фаолиятимни якунлаган бўлсам, ҳеч ҳам 18 йил мураббийлик фаолият олиб бораман, деб ўйламаган эдим. 2000 йилда мени Дания терма жамоасига ёрдамчи мураббий сифатида таклиф этишган эди. Ўшандан бери мураббийлик фаолиятимни тўхтатганим йўқ. Мен футболни севаман, бироқ ҳаётда бошқа нарсалар ҳам мавжуд. Ҳар куни машғулотлар, самолётдаги парвозлар, меҳмонхоналар, асабий ўйинлардан чарчадим... Айниқса, аэропортда, таксида, меҳмонхонада кутишдан зерикдим. Бу омиллар мени тушкун кайфиятда қолдирмоқда. Умр ўтиб кетмоқда. Ҳаётдаги бошқа лаззатлардан тотиб кўриш учун тобора оз вақтим қолмоқда…"

Бу Лаудрупнинг мураббий сифатида берган энг сўнгги интервьюси эди. Марcа нашри билан бўлган суҳбатдан 3 йил ўтиб, қаҳрамонимиз ТВ 2Спорт учун катта интервью беришга қарор қилди. Ўртадаги паузадан сўнг, Микаэл ўз қарашларини ўзгартирган кўринади. Тез орада яна футболга қайтса, ҳайрон бўлиб ўтирманг!

«Мен 3 йилдан бери машғулотларда иштирок этмаяпман. Тўғриси, ҳозирги ҳаётимдан мамнунман. 3 набиранинг бувасиман. Тан оламан, футболни соғиняпман, лекин қайтсам, бир йилнинг 11 ойини иш билан ўтказишга мажбур бўламан. Бир йилнинг 10/9 қисмини асабий воқеаларга сарфлаш ниятида эмасман. Баъзида кетиб бораётган поезднинг сўнгги вагонига сакраб чиқиб олгим ва яна мураббийлик фаолиятимни тиклагим келади. Бошқа ҳеч қачон мураббийликка қайтмайман дея олмайман. Бу сўзларни айтиш мен учун оғир. Нима бўлган тақдирда ҳам, бу спорт тури менинг қалбимдан муқим ўрин эгаллаган».

Микаэл ҳозир футболга қайтган. Турли телеканалларда эксперт сифатида фаолият олиб бормоқда. Баъзида футбол шарҳида ҳам уни кўришимиз мумкин. У футбол ва сокин ҳаёт ўрасидаги олтин ўрталикни топди десак, адашмаган бўламиз. Эндиликда, қаҳрамонимиз ҳар ҳафта теле экран орқали чиқишлари ёрдамида мураббий ва футболчиларга босим уюштиришда давом этмоқда.