Жасорат соҳибалари. 100 миллион сўм гонорар олгани ростми? Навбатдаги рақиби ким? Ситора Шагдарова барчаси ҳақида очиқчасига гапирди

  Аёлларнинг спорт мусобақаларида иштирок этишига барча кўникиб улгурган. Бугун қизлар бадиий гимнастика, сузиш, фигурали учишдан ташқари футбол ўйнайди, бокс рингида жанг қилади. Навбатдаги қаҳрамонимиз гўзал ва латофатли бўлиш билан бирга бокс оламида ўз номига эга Ситора Шагдарова.
  Ситора 2000 йил 5 июл куни Қашқадарё вилояти Қарши шаҳрида туғилган.
 -Ассалому алайкум, Ситора бугунги кундаги машғулотларингиз ва олдинда бизни кутиб турган мусобақалар ҳақида айтиб берсангиз.

 -Ассалому алайкум, ҳозир Қашқадарёдаман, 11 июлгача шу ерда машғулот олиб бораман. 12 июл кунидан бошлаб эса терма жамоа йиғинига қўшиламан. Машғулотларни икки маҳалда: эрталаб ва кечқурун ўтказмоқдаман. Мусобақалар эса шу ойнинг охирида, тахминан 28 июл куни профессионал боксда жанг ўтказаман, ҳаваскорлар боксида турнирлар учун ҳам тайёрланмоқдамиз. 2023 йилда Осиё ўйинлари ва Жаҳон чемпионати старт олади.

 -Профессионал боксдаги рақибингиз ким?
 -Навбатдаги рақибим тожикистонлик қиз. Яна 4та жангдан кейин Жаҳон чемпионати камари учун жанг қиламан. Мени вазнимда Жаҳон чемпионати камари туркиялик қизда.
 -Энди ўзингиз ҳақингизда гаплашсак, бу спортга қизиқишингиз ва мураббийларингиз кимлар бўлган?
 - Мен спортга 8 ёшимда кириб келганман. Биринчи футболда фаолият олиб борганман, 6 йил давомида "Севинч" клубида тўп тепганман. Сўнг оёғимдан жароҳат олиб футболни тарк этишга мажбур бўлганман. Икки йил спортдан дам олиб 15 ёшимда бокс билан шуғулланишни бошлаганман. Боксга ўзим жуда қизиқар эдим ва ойим мени мураббийлар олдига етаклаб борганлар. Биринчи мураббийим ҳам, ҳозирги кундаги мураббийим ҳам Шарофов Зокир ака. Шундай қилиб 7 йилдан буён боксчиман.
 -Аёллар спорти эркакларникидан фарқ қилади деб кўп бора эшитамиз, айнан қайси жиҳатлари бошқача?
 - Қизлар болаларга нисбатан анча нозик бўлади. Ҳар бир қиз - у ўзини ўғил болага ўхшатиб олган бўлса ҳам нозиклик бўлади. Менимча, энг катта фарқ шу.

 -Кўп бора эшитамиз, аёллар спортида эркакларникичалик кўп пул айланмайди деб. Бу қанчалик тўғри, сиз профессионал жанг ўтказган спортчи сифатида нима дея оласиз?
 - Қизлар ҳозир йигитлар билан бир хил ойлик олишади. Масалан ҳаваскор боксда Жаҳон чемпионати учун 100 минг АҚШ доллари берилади: аёлларда ҳам эркакларда ҳам. Профессионал боксга келсак, мен энди битта жанг ўтказдим ва катта гонорарни энди оламан.
 -100минг АҚШ доллари финлада ғалаба қозонган боксчига берилади, тўғрими?
 - Ҳа, 2 ўринга 500 минг АҚШ доллари ва 3 ўринга 250 минг АҚШ доллари берилади.
 -Сизнинг энг катта олган гонорарингиз қанча бўлган?
 -100 миллион сўм
 -Мана ҳозир машғулотларда қатнашяпсиз, бу учун ҳам маош тўланадими?
 - Аслида, машғулот учун ҳам ойлик беришади, лекин мен ҳаваскорлар ичида 3 ўринга тушиб қолганим учун олмайман. 2021 йилда олар эдим.

 -Оилангиз ҳақида ҳам айтиб берсангиз, сиз каби спортчилар ҳам борми?
 - Оилада 3 кишимиз: ойим, укам ва мен. Ойимнинг соҳалари муҳандислик, укам эса мен каби спортчи. Сузиш спорти билан шуғулланади.
 -Ҳар бир қизнинг энг катта орзуси келин кўйлак кийиб, турмушга чиқиш бўлади. Сиз қачон турмуш қурмоқчисиз?
 -Ҳар бир спортчининг энг катта орзуси Олимпиадада қатнашиш ҳисобланади. ИншаАллоҳ 2024-йилдаги Париж Олимпиадасидан кейин турмуш қуриш ҳақида ўйлаб кўраман.
 -Машғулотлардан бўш вақтингизда нималар билан шуғулланасиз?

 - Асосан кубик-рубик ўйинига қизиқаман. Шунингдек, уй ишларини қилишни ҳам яхши кўраман.
 -Бироз вақт ўтгач фаолиятингизга якун ясашга тўғри келса, қандай машғулот билан шуғулланасиз?
 -Тўғриси, шахсий машғулотлар залимни очмоқчиман. У ерда мураббийлик қилмоқчиман.
 -Ситора, озруларингиз амалга ошишига тилакдошман, қолаверса, аёллар спортида кўрсатаётган қаҳрамонлигингиз қизларга ўрнак бўлаётганидан жуда ҳурсандман.
 -Раҳмат, иншаАллоҳ мусобақаларда Ватанимиз шарафини муносиб равишда оқлашга ҳаракат қиламан.

                                       Дилноза Мустафоқулова сухбатлашди