Лапорта: "Реал"нинг даъволари – асоссиз. Улар "Барса"нинг энг кучли даврини кўтара олмаяпти"

"Барселона" президенти Жоан Лапорта "Реал" президенти Флорентино Переснинг "Барса"нинг тарихдаги энг кучли даври Негрейрага тўланган маблағлар билан "мос келган" деган баёнотига жавоб қайтарди.

"Уларда қандайдир таъқиб хаёли бор. Улар "Барса" 2004–2015 йилларда дунёнинг энг кучли жамоаси бўлган даврни қабул қила олмайди. Ўша пайтда клуб мутлақ гегемон бўлган, улар эса бунга баҳона излашяпти. Бу баҳоналар эса ҳеч қаерга олиб бормайди.

Биз энг чиройли ва эътироф этилган футболни намойиш этган жамоа эдик. Одамлар бизга ҳурмат билан қарарди, биз кўп титуллар ютдик ва бутун дунё "Барса"нинг ўйин услубига маҳлиё бўлган. Шундай экан, ўзларини оқлайдиган асоссиз баҳоналар излашмасин.

Агар улар "Барса"га шу қадар боғланиб қолишган бўлса, демак, бу яна бир марта "Барса" муваффақиятли даврга кирганидан дарак. "Реал ТВ" ҳар ҳафта ҳакамларга таъсир ўтказишга ҳаракат қилади.

Ассамблеядаги чиқишларида Ла Лига президентини ҳужум қилишганидан кейин менда шубҳалар пайдо бўлди. Менинг Хавьер Тебас билан айрим келишмовчиликларим бўлган, лекин у — ишига жонкуяр, ҳалол инсон. Бизда унга нисбатан махсус ҳолат йўқ — муносабатларимиз оддий ва профессионал. “Барса”нинг ҳаммаси нормал, “Реал”нинг эса доимий конфликт. Улар Тебасни алмаштиришга ошиқишяпти. 

Тебас Ла Лига манфаати учун қўлидан келган барча ишни қилади. Шунинг учун “Реал”нинг уни четлатмоқчи бўлаётгани менга жуда шубҳали туюляпти — улар уни ким билан алмаштирмоқчи?" — деди Лапорта.