“Манчестер Сити” Холанд бўйича маълумот берди

“Манчестер Сити” ҳужумчиси Эрлинг Холанд Англия кубоги чорак финалида “Борнмут” билан бўлган учрашувнинг иккинчи бўлимида оёғидан шикастланган эди.

24 ёшли тўпурарнинг жароҳати жиддий экани тахмин қилинмоқда.  

Клуб матбуот хизмати ҳужумчи атрофидаги ҳолат бўйича баёнот берди.

- Эрлинг Манчестердаги клиникалардан бирида  бирламчи тиббий кўрикдан ўтказилди. Энди у жароҳатнинг даражаси ва кўламини аниқлаш учун шифокор мутахассисларга мурожаат қилади.

Жароҳатнинг жиддийлик даражасини баҳолаш ишлари давом  этмоқда ва шундан сўнг якуний ташхис қўйилади. Холанд мавсум охиригача сафга қайтиб, қолган ўйинларда, хусусан ёзда бўладиган клублар ўртасидаги жаҳон чемпионатида иштирок этиши кутилмоқда, - дейилади “Манчестер Сити” матбуот хизмати тарқатган баёнотда.

Холанд жорий мавсум клуб миқёсида барча турнирларда 40 та учрашув ўтказиб, ўз ҳисобига ўттизта гол ва тўртта голли узатма ёздириб қўйди. Унинг амалдаги шартномаси 2034 йилнинг ярмигача давом этиши белгиланган.