Мбаппенинг сермаҳсуллиги “Реал” мухлисларига ёқмай қолди

2024 йилнинг ёзида ПСЖдан “Реал”га эркин агент мақомида кўчиб ўтган Килиан Мбаппе қисқа фурсат ичида Мадрид клубининг асосий қуролига айланиб қолди.

Франциялик футболчи жорий мавсумнинг тўққизта учрашувида 13 та гол урди. Бош мураббий Хаби Алонсо барча учрашувларда 26 ёшли юлдузини бошланғич таркибда майдонга туширмоқда.

Diario AS нашрининг ёзишича, “Реал” мухлислари орасида жамоада юзага келган вазият кучли хавотир уйғота бошлади. Фанатларга жамоа фақат бир ўйинчи, яъни Килиан Мбаппега боғланиб қолаётгани ёқмаяпти. Бу ҳолат вақти келиб клуб зиёнига ишлаши мумкинлиги айтилмоқда.

Дарҳақиқат, Килиан Мбаппе ҳозир ҳужум чизиғида алмаштириб бўлмас ягона ўйинчи ҳисобланади. Олдинги чизиқнинг қолган вакилларига барқарорлик етишмаяпти ва бу клубда мувозанат бузилишини келтириб чиқаради.